Tremendos os resultados que deixa a penultima xornada da Liga da Inverneira. Deixan unha derradeira xornada de competición con moitos frentes abertos á espera das previsións para o domingo. Para ser unha xornada sen chuvia a cousa estivo moi movida, con 8 compoñentes do Top-10 entre os 10 mellores resultados en Ponteareas. Imos explicar estes datos e o impacto que poden ter na arrancadeira en Xesteiras.

A temperatura mínima chegou na madrugada ata os -2º C., un valor ó que ninguén tivo en conta. Pola tarde acadóuse a máxima diaria con 17º C., na media da maioría dos mellores. O baleiro de chuvia sí que era agardado, e o vento marcou un refacho máximo de 18 km/h. unha marca moi baixa pero acorde ó burato onde se xogaba.

E así, gañou que máis o necesitaba, mostrando de novo por qué é o mellor xogador historicamente. Botikas acadou 58 puntos e a vitoria en soidade. Foi o máis arriscado na temperatura mínima, na que perdeu un só punto e outro máis no refacho de vento, tamén moi atinado. Ademáis reduciu en 3 puntos á vantaxe co liderato, con somentes dous puntos por baixo e o desempate ó seu favor. Semellaba imposible pero xa ten a punto de lambetada a posibilidade de repetir o título. Non quixera estar no pelexo de Magor…

56 puntos para Mina, Julio e Verducido, no posto 4º, 5º e 6º respectivamente. Mina sitúase a 2 puntos do podio que ostenta Beocha. Julio terá que defender a posición con Popolo e Verducido, que o sobrepasou e queda un punto por riba e 2 por baixo de Julio. Menudo fin de Liga van ter os tres.

Con 55 puntos a lideresa Magor, que ainda que tremendo segue a ostentar o posto de privilexio na cacheira da xeral. Só ten que aguantar unha xornada máis, ainda que seguro que devece por algo da chuvia que lle deu tantas ledicias. Semellante caso para Beocha, que terá que protexer a posición sobre Mina con dous puntos de vantaxe. Landrán vai ter tamén a súa oportunidade de ascender ata o 8º posto que mantén Sarabia por 3 puntos. Outro final de liga de infarto.

Compoñente Sur, con 54 puntos, outro dos que ten choio en Xesteiras. Nada menos que entrar no Top-10 que sostén Xowi cunha diferenza de 2 puntos. E o canadiano a defenderse…

Por último, Kaltxon con 53 puntos, ten compricado ascender, pero terá que conter os ataques de Breogan77, a quen adiantou nesta xornada de A Granxa. Outra loita sen cuartel.

Estes foron os 9 mellores marcadores da peníltima xornada en A Granxa. E o que promete Cuntis coma fin de festa. Para acadar tódolos datos resultantes desta etapa pica no enlace que ofertamos baixo este texto.

A polo éxito na arrancadeira!!

Penúltima xornada a desputar en A Granxa, no concello de Ponteareas e semella que o anticiclón vai deixar para o derradeiro día as oportunidades postreiras. Pero ainda que non agardamos chuvia nin apenas vento, as temperaturas xogarán un papel importante na definición da etapa. Amais do que se xoga na clasificación xeral, estamos ante unha das derradeiras ocasións de sumar unha vitoria, aliciente de importancia tanto para ter vantaxe nos desempates coma para aumentar esa conta histórica. Sempre hai unha razón para ter vontade.

As apostas en temperatura máxima están moi abertas e van dende os 10 ata os 18º C. Os valores para as mínimas oscilan entre -1 e os 7º C., tamén con grande amplitude. As precipitacións están ausentes salvo nun marcador, cuns arriscados 5 litros, mentras que os refachos de vento van dende os 12 ata os 37 km/h.

Estamos ante unha xornada cun resultado moi difícil de augurar ó atopar moitas diferenzas entre valores apostados e a carencia de precipitacións. Non semella doado augurar un vencedor e menos en soidade, pero cousas máis compricadas sucederon. Non deixes de seguir a xornada ao vivo dende este enlace a partires das 01:40 desta mesma madrugada e dende a mañanciña do domingo ata o final do día.

As apostas:

Saúde e sorte!!

Xinzo foi unha etapa con altas puntuacións, de perfil baixo, isto é, de temperaturas dentro do agardado, mínima chuvia e vento medio.pero ainda así, a estas alturas da papadela, xa no postre, deu unha volta máis na arandela da clasificación xeral. Lonxe de clarexar o desenlace e de despexar dúbidas, cubríu de neblina o final de competición, á que somentes lle restan dúas citas.

A temperatura mínima chegou na madrugada ata os 4º C., na media das prediccións dos mellores desta edición. Pola tarde acadóuse a máxima diaria con 11º C., na media da maioría dos pronósticos. O único litro de chuvia sí que era agardado, e o vento marcou un refacho máximo de 43 km/h. que deixou ledos á gran maioría de apostantes.

A vitoria correspondéulle con 58 puntos a dous meteoludópatas con distintos obxectivos nesta recta final de Liga. Para Denodeno significa a primeira vitoria e cuarta histórica. Na súa posición, a 24ª, nada mellor podía agardar, polo que noraboa. Para Víbora é a segunda, que pode ser importante no caso de empate na súa loita por chegar ata o Top-10. Moi preto da 11ª praza, veremos se pode chegar ainda máis alto.

E o que defende esa praza sumou en Xinzo 57 puntos. Xowi mantén a posición e acosa a Landrán na 9ª. Deféndese atacando, boa estratexia. Mesmos puntos para Bar Pequeno, que dende o Top-25 ve pasar a vida e agarda á primaveira e vran para volver dar a sorpresa.

56 puntos para Breogán77 que leva dúas derradeiras xornadas con marcas de alto rendimento. Non semella que poida dar máis de sí, non sendo unha vitoria parcial. Pero sí pode Modesto, que seica agardou ata o final para pisar o acelerador, mantendo unha mínima esperanza de chegar ata o Top-10. Pola súa banda, Sarabia despégase de Landrán e asexa a Verducido e Julio tentando recuperar a praza perdida.

Finalmente, con 55 puntos, tres Top-4. O semideus Botikas volve restar puntos co liderato e queda a 5 puntos de Magor a falta de 2 xornadas. Non se lle pode pedir máis, dando a emoción necesaria o fin de festa. Beocha e Mina, 3ª e 4ª manteñen unha loita sen cuartel polo podio e algo máis. O fin de semana do 8 de marzo, festa das donas, temos 3 no Top-5 e reivindican protagonismo nesta edición da Liga da Inverneira.

Esta foron as 10 mellores puntuacións na 24ª xornada, desputada en Xinzo. Para acadar tódolos datos xurdidos desta etapa pica no enlace que ofertamos baixo este texto.

Sorte e clima!!

Antepenúltima xornada da XI Liga da Inverneira a desputar en Xinzo coa presenza de Jana, unha borrasca do Atlántico que nos vai visitar, ainda que semella de xeito testimonial, de acordo o sinalado polas apostas. Somentes quedan tres oportunidades de mellora de clasificación e, ainda que Xinzo non parece que remexa moito o avispeiro, pode ser unha maneira de achegarse un pouco ata os obxectivos fixados.

As apostas en temperatura máxima están moi pechadas e van dende os 9 ata os 12º C. Os valores para as mínimas oscilan entre 0 e os 5º C. As precipitacións establécense entre os 0 e os 7 litros, mentras que os refachos de vento van dende os 24 ata os 73 km/h.

Estamos ante unha xornada cun resultado moi difícil de augurar ó atopar moita semellanza entre valores apostados. Non semella doado atopar un vencedor e menos en soidade, pero cousas máis compricadas sucederon. Non deixes de seguir a xornada ao vivo dende este enlace a partires das 01:40 desta mesma madrugada e dende a mañanciña do domingo ata o final do día.

As apostas:

Sorte e clima!!