Derradeira rolda de competición nesta tempada 2023/24 en eltiempoentuojete e abofé que foi emocionante ata o derradeiro minuto. En breve presentaremos unha listaxe coa clasificación xeral máis clara que a que podes ver no Cadro de Competición, ainda que os competidores sabedes o resultado polo que loitabades. Antes de comentar os resultados finais, unha pequena reseña da xornada.

A temperatura mínima marcouse na primeira e na derradeira hora da etapa, sendo esta de 26º C. A máxima foi a media maña acadando os 31º C. A chuvia non apareceu ou cando menos o pluviómetro non a reflectiu e o refacho foi feble pero subindo cara o final do día ata os 18 km/h. e repartindo alegría e tristura a partes iguais. O refacho final dos últimos 15 minutos decidiu 2 dos enfrontamentos.

A gran final non defraudou, sendo a máis competida e de mellores puntuacións. O título da Ojete’s Cup alzóuno Mingos, que ademáis gañou a etapa, inda que fora compartida. 56 puntos, con puntuacións equilibradas en tódolos parámetros que deixaron en anécdota os 55 puntazos de Landrán que leva o subcampionato. Benvido Mingos o Olimpo meteoludópata e noraboa a Landrán, que como se dí sempre, dentro de pouco esquecerá a derrota e valorará o acadado en Bengala. E grazas polo espectáculo brindado.

O 3º chanzo do podio foi para Verducido á conta dese refacho final, que engadíu un punto na súa conta e quitóullo a Denodeno, quen saía vencedor do desempate. Por iso hai que agardar ata o final, sempre pode haber sorpresas. Verducido acada un podio máis nesta competición e Denodeno segue a facer historia propia nun vran 2024 que non esquecerá. Noraboa ós dous.

Botikas logrou un diploma máis na Ojete’s Cup superando con facilidade a Michi, que non se pode queixar do seu 6º lugar. A diferenza estivo en consultar os resultados da estación e, nese campo, Botikas é un experto. Michi e as súas apostas no derradeiro minuto demostraron inexperiencia. Pudo ser mellor para os dous pero non estivo mal.

O punto decisivo polo 7º lugar entre Rasta e Compoñente Sur estivo na chuvia pronosticada, que lle deu a vitoria a Compoñente Sur para rematar con sabor dulce nos beizos. Rasta xa fixera a súa fazaña eliminando ó cacheira de serie número 1 na rolda inaugural.

A final B foi para Beocha, que despois de apostar seca en Berhampore non tivo dificultade para derrotar a Punteiro, afogado en Bengala. Beocha marcha con tres vitorias en catro enfrontamentos. Perder na 1ª rolda penaliza moito pero pode marchar con orgullo. Punteiro non se pode queixar despois das penalizacións por retraso.

De Sarabia somentes felicitala por apostar, cousa que non fixo Pájaro, regalando a vitoria no derradeiro día de competición.

Julio foi o outro beneficiario dese refacho de última hora, ainda que tiña vantaxe no desempate con Víbora. Dous grandes xogadores que non poden estar contentos, ainda que a vitoria de etapa axuda a Julio a despedir a tempada. De Víbora agardamos mellores noticias en próximos concursos.

Marius e Bar Pequeno tampouco deben de estar contentos. Marius evitou a vergoña pola incomparecencia de Bar Pequeno, que partindo do número 1 e perdendo a rolda 1 non volveu apostar. Marius ten máis categoría do que sinalan os números da Ojete’s Cup en Bengala e agardamos que amose todo o seu potencial.

Para coñecer todo o acontecido nesta xornada final de tempada, pica no enlace que ofertamos baixo este texto.

En breve daremos noticias dos próximos acontecementos, pero se non sucede nada catastrófico verémonos coma sempre a finais de setembro na costa de Corrubedo. Desfrutade do descanso e seguide atentos.

Saúde e sorte!!

Berhampore é a derradeira parada nesta Ojete’s Cup 2024 en West Bengala. Decídense as posicións finais do torneo e despídese a 11ª tempada ata o comezo da 12ª datado cara o fin de septembro. Coa vista posta na gran final, na loita polo podio, o quinto posto e a final B, entre os enfrontamentos máis destacados, imos debullar a 4ª e última rolda de competición.

As temperaturas máximas oscilan entre os 30 e os 34º C. Os valores das mínimas están entre os 25 e os 26º C. As apostas en pluviosidade van dende os 0 ata os 8 litros, mentras que para o refacho de vento rexistramos cifras que van dende os 17 ata os 36 km/h.

A gran final entre Mingos e Landrán está moi moi apertada, con apostas semellantes en temperatura e chuvia, só diferenciados por 7 km/h. no refacho de vento. Decidirase neste parámetro e por moi pouquiño. Máis aberta en principio está a loita polo 3º posto entre Denodeno e Verducido, con discrepancias en tódolos parámetros ainda que o resultado final pode ser axustado.

As diferenzas entre Michi e Botikas no enfrontamento pola 5ª praza están na cantidade de auga recollida, factor decisivo do resultado. E serán detalles os que decidan o 7º posto entre Rasta e Compoñente Sur, con valores moi similares.

Na batalla pola final B e o 9º posto as discrepancias entre Punteiro e Beocha baséanse na temperatura máxima e na cantidade de chuvia. Polo posto 11 Sarabia teno feito pola incomparecencia do seu rival, Pájaro.

E moi apertado vai estar o combate entre Víbora e Julio polo posto 13, con valores semellantes en tódolos parámetros. Por evitar a vergoña, a incomparecencia de Bar Pequeno deixa camiño libre a Marius para obter unha vitoria pola que de seguro suspiraba.

Non deixes de seguir ao vivo dende este enlace a resolución deste torneo, con resultados en direto dende as 02:30 desta mesma madrugada e a partires da mañanciña do domingo ata o final da etapa.

As apostas:

Saudos e sorte!!

Penúltima eliminatoria de cara á consecución dunha posición final e despois da celebración da 3ª rolda xa dispoñemos dos enfrontamentos definitivos nesta Ojete’s Cup 2024 en West Bengal. O fin da 11ª tempada aproxímase e mellor deixar un bó sabor nos beixos que un amargor de boca ata o inicio da seguinte.Imos desbrozar a etapa de Digha.

A temperatura mínima déuse ben cedo marcando uns 25º C., no rango das apostas cativas. No canto das máximas acadáronse os 32º C., no rango medio do prognosticado. Non choveu ou polo menos o pluviómetro ficou caladiño mentras que os refachos de vento chegaron ata os 16 nos, 30 en km/h.

Con estes valores temos 2 vencedores con 58 puntazos. Polo lado verde Landrán accede á súa primeira final da Ojete’s Cup e polo lado vermello repite vitoria Beocha, o que lle da o pase á final B na súa parte do cadro de competición.

Landrán e Verducido loitaron a moitísimo nivel de puntuación. O acerto de Landrán na temperatura mínima xunto a unha gran aposta en refacho danlle o pase á final. Moi parecido o resultado entre Mingos e Denodeno, decidido polo acerto na temperatura máxima e un gran refacho finalizando con 3 puntos de diferenza. Final inédita entre Landrán e Mingos e loita polo podio entre Denodeno e Verducido.

Non deu opción Botikas a Rasta, gañando sen discusión en tódolos parámetros. Menos nivel no enfrontamento entre Michi e Compoñente Sur que non acadaron os 50 puntos e gran diferenza para Michi. Recordarlles investigar os resultados da páxina do IMD onde non consta chuvia nengunha nos derradeiros días. O 5ª posto despútase entre Botikas e Michi, mentras Rasta e Compoñente Sur buscarán o 7º lugar final.

Punteiro gañóulle a Pájaro sobre todo pola cantidade de chuvia e accede á final B. Beocha mete medo nas derradeiras xornadas e meterlle 8 puntos a Sarabia con vitoria de etapa e buscará o 9ª posto fernte a Punteiro. Pola contra, Pájaro e Sarabia van na busca do 11º lugar.

Víbora gañou por unha nova incomparecencia de Bar Pequeno evitando a vergoña das 4 derrotas. Julio superou a Marius pola chuvia, xa que Marius tivo mellores resultados no resto de parámetros. Víbora e Julio loitarán por a 14ª praza, que semella pequena para estes grandes xogadores. Marius e Bar Pequeno loitarán por evitar a vergoña de perder tódolos enfrontamentos deste torneo.

Para acadar todos os datos recabados en Digha, na 3ª rolda da Ojete’s Cup 2024, preme no botón que deixamos baixo este texto.

Sorte e clima!!

Chegamos á 3ª rolda da Ojete’s Cup en Bengala facendo parada e fonda en Digha, a cidade de vacacións do sureste do estado de West Bengal. Temos as loitas por entrar na final do torneo, polo 5º posto, por acadar a final B e por evitar a vergoña de perder tódolos enfrontamentos, ainda que queda outra rolda para decicir algunhas cousas definitivamente. Pero mellor ir adiantando traballo e non deixalo para o último momento.

As apostas para temperatura máxima van dende os 30 aos 34º C, mentras que as mínimas encádranse entre os 25 e os 28º C. As apostas sobre chuvia divídense entre quen mirou a traxectoria de resultados desta semana e os que semella que non. Os que fixeron seguimento apostan pola seca total, un total de 6 competidores, mentras o resto aposta por entre 2 e 21 litros. Polo que respecta ós refachos de vento, oscilan entre os 10 e os 38 km/h.

Na loita de semifinais as apostas entre Landrán e Verducido son moi parellas, cun único grao de diferenza en temperaturas e 5 km/h. no refacho. No mesmo caso están Denodeno e Mingos, ainda que cunha maior diferenza en vento.

Por acceder ó 5º posto están Rasta e Botikas, co primeiro con valores máis baixos en temperatura e vento pero con 5 litros de auga contra 0. Michi e Compoñente Sur teñen apostas similares en temperatura e vento pero con gran diferenza na cantidade de auga.

Buscando a final B, Punteiro e Pájaro teñen pouca diferenza en temperatura, media en chuvia e grande en vento. Beocha e Sarabia basan a súa desigualdade sobre todo na auga recollida.

Para evitar a vergoña temos a Bar Pequeno e Víbora e a diferenza é a incomparecencia de Bar Pequeno que asegura a Víbora unha vitoria con sabor a gloria. Julio e Marius teñen desavenencias en tódolos parámetros, que poden quedar en nada se os resultados cadran na metade das súas discrepancias.

Con todo isto temos ante nós unha xornada vibrante coa etapa final á vista e con ganas de facer os deberes antes do exame. Non podes deixar de seguila ao vivo dende este enlace a partires das 02:30 horas desta mesma madrugada e en horario contínuo dende a mañanciña do domingo ata o remate do día. Non perdas unha das etapas decisivas da competición que bota o peche da 11ª tempada de eltiempoentuojete!!

As apostas:

Saudos e sorte!!