A 21ª etapa da Liga da Inverneira foi o cumio final da xeira celebrada nas montañas galegas do oriente do país, situadas nas provincias de Ourense e Lugo. Despóis deste percorrido polas cotas superiores a 900 metros, vai sendo hora de voltar as xornadas de chan. Pero Lardeira deixa moito que contar, con chuvia, vento e temperaturas baixas que deixan pegada na xeral, algunhas que semellan definitivas e outras que se fan ainda máis impredecibeis. Unha é o dominio absoluto de Kaltxon no liderato e a outra a incertidume por ver cómo remata esa loita sen cuartel polo Top-10, onde semella que ainda quedan 2 prazas en desputa. Carballeda de Valdeorras vivíu unha xornada de emoción ata o derradeiro minuto.
A temperatura mínima acadóuse no abrente da madrugada con -3º C. que xa subiría ata os 2º, con dificultade, xa entrada a derradeira hora. A presenza da chuvia era moi probable e paseniñamente o principio e bategando despóis e acadou un resultado de 4 litros. O vento marcou un refacho máximo de 83 km/h., preto do que apostaba a elite da xeral.
O refacho e unha inesperada subida da temperatura deulle a razón, a vitoria e practicamente a Liga a Kaltxon. 58 puntos cunhas marcas incontestables que lle serve en bandexa a vitoria final a falta de 6 xornadas. 6 vitorias nesta edición fala ás claras da calidade do animal. Semella que ata o final vai ser un paseo cara o Olimpo meteorolóxico amateur. 23 puntos de vantaxe sobre Beocha resulta unha diferenza inalcanzable, tendo en conta a traxectoria e o que resta para o final. Pero, poderá concretalo?
56 puntos para Verducido que o colocan a pé de podio despóis de recortasr distancias con Botikas e Julio, os tres agora nunha diferenza de 3 puntos, o que vaticina unha dura loita polo 3º chanzo da xeral. Outros tantos puntos para Lume, que se mete de cheo nesa loita polo Top-10, no 11º posto compartido con Rasta e Rasdgar, ainda que sen vitorias para o desempate. Moito que falar ainda nestas 2 zonas da clasificación.
55 puntos para Marius, que atosiga a un Landrán que semella recuperou folgos, ainda que sen alento por defender unha 6ª praza que vai ter batalla ata o derradeiro instante, vendo quén son os dous participantes en liza.
Landrán está no grupo dos 54 puntos, defendendo cos dentes unha praza que agora lle parece pequena para o lugar que ocupou peroque é o cravo candente ó que se ten que aferrar. Beocha ve como Kaltxon está intratable e, ainda que non deixará de loitar, observa co rabiño do ollo como por tras váise abrido oco e respira de alivio. Mina semella mordeu o Top-10 e non o quere soltar, trepando ata o 8º posto e poñendo terra de por medio cos seus persecutores.
Julio aférrase á loita polo podio sumando 53 puntos, atopándose entre dúas bestas da predicción amateur coma Botikas e Verducido. Son tres lobos famentos e Julio vai ter que suplir a desvantaxe da experiencia con coraxe para dar unha puñada na mesa.
Nonsendo o liderato, os marcadores dos involucrados nas loitas polo Top-10, o podio e diversas zonas medias como o 6º posto, están cada vez máis parellos, o que augura emoción ata o final no monte Xesteiras. As augas termais non van apaciguar a quentura dos que “andan na llama“.
Estes foron os 8 competidores mellor puntuad@s nesta etapa de grande emoción na loita, na cima de Lardeira. Para acadar tódolos datos recollidos na 21ª etapa da XII Liga da Inverneira pica na ligazón baixo este texto.