A 9ª xornada da Liga da Inverneira deixa un resultado atípico, ainda que non será a primeira nin a derradeira vez. Os que eran dos últimos clasificados da xeral ocuparon os postos de honra en Lira. Incluso temos a un dos novatos desta edición inaugurando o casilleiro de vitorias. Xornada onde os cacheiras de cartel estiveron moi por baixo do que se agardaba deles pola súa traxectoria. A chuvia desprazóuse cara o sur e foi a provincia de Pontevedra a que deixou á Costa da Morte con valores inferiores ó agardado. Poucas diferenzas entre os habitantes do Top-10.

A temperatura mínima acadóuse na madrugada con 12º C., cumprida para o frío que predicían as axencias. Na derradeira hora da sobremesa acadóuse a máxima diaria con 16º C. A presencia da chuvia era ineludible, pero moi inferior á agardada, e os máis conservadores foron os trunfadores. O vento marcou un refacho máximo de moita consideración, por riba do máximo apostado con 86 km/h.

E eiquí asomou un invitado pouco agardado, Enrico Ferni, quen con 42 puntos acada a súa vitoria inaugural, e por todo o alto, en soidade. Deixou 10 puntos na auga e outros 8 na temperatura, pero os marcadores dos postos privilexiados non foron quen de desbancalo. Na xeral segue por alá embaixo, pero a vitoria non lla quita ninguén.

Con 41 puntos e unha das mellores apostas en chuvia entrou Óscar, pero a súa aposta en vento foi moi mala e quedou a un punto do trunfo. As lecturas de temperaturas non foron as mellores pero marca a segunda mellor puntuación da xornada.

E 38 puntos para Rasta e Marius, os dous mellores puntuados entre o Top-10. Rasta ten a honra de anotar o único punto de auga dentro dese top de escollidos e sube unha posición ata a 9ª. Marius empata a puntos con Verducido e mantén a 8ª praza.

Dos que suman 37 puntos destacan Kaltxon e Landrán, os dous primeiros clasificados que ainda melloran a súa situación e poden dar cun canto nos dentes. A mención especial é para Bar Pequeno, a mellor aposta en chuvia (17 de 20 puntos) e a pior en refacho (5 de 20 puntos). Estariamos a falar do mellor en Lira, pero “foi polo aire e viu polo ventooo”.

Mina acadou 36 puntos en Lira e aproveitando esa mísera puntuación ascende 3 prazas dende a 19ª ata a 16ª.

E con 35 puntos aparecen o 3º e a 4ª clasificada, Julio e Beocha, que alonxan un pouco ó aspirante número 1, Botikas, que este ano ve como se lle suben ás barbas unha chea de xogadores que levan agardando o seu momento varias tempadas. Julio e Beocha son claros exemplos de insubordinación.

Estes foron os 10 competidores protagonistas desta etapa brava de Lira. Para acadar tódolos datos recollidos na novena etapa da XII Liga da Inverneira pica na ligazón baixo este texto.

Achegándonos ó inverno!!

O domingo en Lira, no concello de Carnota, asistiremos á derradeira exhibición de forza da borrasca Claudia. Seica lle colleu o gusto á nosa latitude e quedou esta semana repartindo auga e vento a dolor. E cando xa semellaba que gastara todo o que tiña, ofrecerá a derradeira (ou non) función para deleite dos meteoludópatas de eltiempoentuojete. Apostas de tódolos colores sobre todo nos parámetros de chuvia e vento, o que deixará resultados variopintos na clasificación xeral e xa veremos qué trocos acontecen.

As apostas en temperatura máxima van estar moi pechadas e van dende os 12 ata os 15º C. Os valores para as mínimas oscilan entre 8 e os 13º C., estas de novo con oscilacións medias. As precipitacións é o parámetro máis discutido, con valores que van a seca, 0, ata os 59 litros. Mentras. os refachos de vento van dende os 15 ata os 84km/h., sendo o parámetro máis aberto.

Non semella doado predicir vencedores con estas grandes diferenzas nos parámetros que son a chuvia e o vento e haberá que agardar ata o derradeiro minuto da xornada, cara as 01:30 horas do luns. Non deixes de seguir a xornada ao vivo dende este enlace a partires das 01:30 da madrugada do domingo, o levar Meteogalicia 1 horas de retraso no aporte de datos.

As apostas:

Outono puro!!

Pois sí, Muralla, a 8ª etapa da Liga da Inverneira con nome de restaurante chinés, non defraudou nesta edición. Tumbou as espectativas das axencias meteorolóxicas máis coitadas, que predicían 2 ou 3 litros, e tamén as das máis audaces, cunha ducia de litros. Choveu arreo dende a sobremesa, bourou o vento e as temperaturas apenas tiveron amplitude. Uns resultados que trocan significativanebte a clasificación xeral, agás o liderato, que se mantén e incluso se confirma. Moita emoción ata o derradeiro minuto no concello coruñés de Lousame.

A temperatura mínima acadóuse na madrugada con 9º C., cumprida para o frío que predicían as axencias. Na derradeira hora da tarde acadóuse a máxima diaria con 11º C. A presencia da chuvia estaba en discusión, e os máis destemidos foron os trunfadores, podédelos ver no alto da táboa. O vento marcou un refacho máximo de bastante consideración entre lusco e fusco con 64 km/h.

E o heroe, mallando a cantidade de precipitación, foi Julio. Tremenda remontada dende a penalización de Corrubedo. Sen ela, sería o líder actual e semella o xogador máis en forma actualmente. Deixou 3 puntos na temperatura mínima e 2 no vento para un total de 55 puntazos. Supera o Top-10 para colocarse 5º empatado con Botikas, pero con menor coeficiente de vitorias. Ousado e eficaz, combinación gañadora.

E 54 puntos e mesma cantidade de chuvia para Landrán, que deixou 3 puntos na máxima, 1 na mínima e outros 2 no refacho. As temperaturas tamén xogaron moito en Muralla, pero sae deste inferno na 2ª posición dende a 5ª e con moito que pelexar co líder. Veremos se segue atinando nesta parte chuviosa do calendario.

3 participantes acadaron 52 puntos. O líder Kaltxon non errou, xogando moi ben as súas cartas en tódolos parámetros. Desfruta dunha vantaxe de 5 puntos sobre o segundo posto e semella moi sólido nesta primeira parte da competición. A 7 puntos do líder asoma Modesto, no seu mellor arranque de tempada, ilusionándose el mesmo e acadando o 3º posto, un podio merecido pola audacia exhibida. Mesmos puntos para Mina, veterana raíña predictiva que colle folgos para entrar nun Top-20 moi desputado. Pode ser un punto de inflexión nesta edición.

Tamén pode ser un punto crítico para Lume, que tamén entra no Top-20 cun punto máis que Mina e cunha traxectoria irregular que pode significar un destino mellor a partir desta etapa de Muralla, con 50 puntos.

Sumando 49 puntos, dúas damas. Beocha é a veterana que sobrevivíu a esta xornada situándose no grupo da cacheira da xeral que abre un rego co resto de persecutores. 6ª praza e opcións intactas. Cris semella que quere conquerir o título de novata do ano e abofé que está no bó camiño. Gran predicción de chuvia, con pouca sorte no resto de parámetros, que lle dan o 14º posto e unha boa achega cara o Top-10.

Estes foron os 8 competidores protagonistas desta etapa salvaxe de Muralla. Para acadar tódolos datos recollidos na oitava etapa da XII Liga da Inverneira pica na ligazón baixo este texto.

Clima ou morte!!