A 7ª etapa da Liga da Inverneira lévanos ata un escenario na beira do río Miño, fronteira natural cos nosos irmáns lusos. Cequeliños, moi preto da Ponte Internacional vai ser o plató onde se desenvolvan as actividades desta fin de semana de competición. A priori non semella un lugar moi chuvioso, nen frío nin caloroso e onde o vento non adoita ser forte, pero iso non significa que sexa doado predicir o clima desta parte do país e iso é o que reflicten os pronósticos.

As temperaturas máximas están representadas dende os 16 ata os 21º C. Polo que atinxe ás mínimas, temos valores entre os 10 e os 14º C. Nas apostas de pluviosidade temos media ducia de apostas sobre seco, o resto entre 1 e 5 litros e unha aposta de 8 litros. No que respecta ós refachos de vento, as apostas van dende os 6 ata os 28 km/h.

A partires destes datos temos ante nós unha etapa moi axustada, onde o vencedor pódese decidir por pequenos detalles. Non deberías deixar de seguila ao vivo dende este enlace a partires da 01:40 horas desta mesma madrugada e dende a mañanciña do domingo ata o fin da xornada. A ver quén pesca a lamprea!!

As apostas:

Saudos e sorte!!

Serra da Faladoira foi desas etapas nas que cada un de nós pódese sentir fachendos@ coa súa actuación. Non sendo os penalizados, os marcadores non baixaron dos 50 puntos. Axudou unha xornada anticiclónica con temperaturas mornas, ausencia de chuvia e un vento velaíño, sen moitas compricacións para a predicción. Non sempre será así…

A temperatura mínima foi alta, con 14º C. na derradeira hora do día, despois dunha grande parte del por riba desa cifra. A temperatura máxima quedou nos 20º C., moi preto dos 21 pero sen acadalos. Como se agardaba a chuvia estivo ausente e o refacho máximo do día marcou os 31 km/h. no anemómetro do concello de Ortigueira.

Cos datos dispoñibles temos unha parella de triunfadores que, ademáis de compartir vida, tamén o fan coa vitoria na Serra da Faladoira. Michi e Sarabia sumaron 58 puntos no marcador, engadindo unha nova riscada no marcador xeral de vitorias. Somentes perderon cadanseu punto nas temperaturas e no refacho, situándose na xeral no grupo que agarda oportunidade ás portas do Top-10. Ben xogado!!

Ata 5 competidores empataron no segundo posto da etapa. Modesto, Botikas, Punteiro, Beocha e Kaltxon quedaron a un mínimo punto da vitoria, pero melloran ou consolidan posicións na xeral. Modesto ascende ata o posto 12, con Punteiro un chanzo por baixo. Botikas segue a manter a posición de cacheira da clasificación, Kaltxon xusto por riba de Modesto, ás portas do Top-10 e Beocha que sube ata o 6º posto, a tiro de pedra do Top-5.

Un total de 7 participantes acadaron os 56 puntos. Magor, a sorpresa deste inicio de Liga ocupa a 4ª praza ameazando o podio. Popolo segue mantendo o 10º lugar, mentres Mingos remonta ata o 19º. Landrán e Verducido conservan o podio, na 2ª e 3ª praza respectivamente. Lume na 5ª e Marius na 7ª seguen a consolidar a súa posición no Top-10.

Para obter tódolos datos recabados nesta 6ª etapa da Liga da Inverneira, pica no enlace que adxuntamos baixo este texto.

Sorte e clima!!

A 6ª etapa da XI Liga da Inverneira é a derradeira onde se da unha marxe de tempo para a entrega das apostas. A partir de agora haberá que ter moito coidado en recordar o día e a hora na que se vive, sobre todo semanas coma esta, cun festivo no venres de aposta. Semella que esta xornada vai ser de transición, debido á tranquilidade que nos da a influencia do anticiclón e a que a terrible DANA do mediterráneo non chegou a afectar ó noso país. Ainda así búscase un gañador entre as apertadas apostas recibidas para a Serra da Faladoira, no concello de Ortigueira.

As apostas recibidas para as temperaturas máximas van dende os 17 ata os 23º C. Polo que respecta ás mínimas, estas oscilan entre os 9 e os 14º C. Ningunha das apostas predixo chuvia e polo que atinxe ós refachos de vento, están encadradas entre os 8 e os 47 km/h.

Moi axustadas as apostas desta semana o que nos indica unha loita con poucas diferenzas en Ortigueira. Non deixes de seguila ao vivo dende este enlace a partires das 01:40 horas desta madrugada e dende a mañanciña do domingo ata o remate da xornada. Andamos na procura dun heróe e tí podes ser ese campión!!

As apostas:

Saúde e sorte!!