Esta semana desputamos a 4ª etapa da Liga de Primaveira e da OjeteQuake 2022 e queremos adicala a tódalas nais no seu día indicado. Do traballo nin falar…

Moita disparidade nas apostas en Brantford, que estivo estragada durante o mércores e o xoves. Hoxe semella estar arranxada e ingresaron os datos do venres sen problema algún. Agardamos non de problemas no día de autos. As apostas en temperatura máxima oscilan entre os 11 e os 17º C. Moita amplitude tamén nas mínimas, con valores que van dende os 3 ata os 10º C. No que atingue á pluviosidade, temos apostas dende 2 litros ata un máximo de 12. Os refachos de vento están representados por valores que van dende os 22 ata os 69 km/h.

Con estas apostas temos ante nós unha xornada con moitas diferenzas entre os competidores e que pode trocar sustancialmente a clasificación xeral. Podes seguir a etapa ao vivo dende este enlace a partires das 06:00 horas desta madrugada.

As apostas da xornada para a OjeteQuake 2022 semellan moi espalladas no mapa. A maioría, coma de costume, amoréanse na zona do sudeste asiático, pero tamén atopamos apostas no continente americano, Mongolia, Sri Lanka, no este de Madagascar ou en Nova Zelanda. A aposta de magnitude máis alta acada os 6,2 Mg.

Podes seguir a etapa sísmica ao vivo dende este enlace a partires da 01:00 horas desta mesma madrugada.

As apostas:

Saúde e sorte!!!

A 3ª xornada da IX Liga de Primaveira estivo marcada pola temperatura máxima, que chegou ata os 28º C. e tamén pola corrección que a axencia canadiana aplicou nos seus rexistros históricos. Non houbo retoque nas temperaturas, que se foron ata a máxima apostada con 28º C. e á mínima das mínimas con 10º C. No caso do refacho de vento, corrixíuse dende os 54 ata os 65 km/h. que amosa o rexistro histórico. O tema da auga tamén tivo retoque, pero sen sequera saber cal eran as condicións meteorolóxicas polo erro da estación de Sarnia. Acadou os 4 litros no histórico, recollidos máis aló das 22:00 horas (polo visto nos videos das cámaras de tráfico).

Despois das revisións, atopamos a 3 xogadores coa máxima puntuación, uns lastimosos 51 puntos. Botikas e Compoñente Sur estiveron acertados nas temperaturas, pero perderon puntos na pluviosidade e no refacho. No caso oposto está Lukas, con baixo rendemento en temperatura e melloría na auga e o vento. Botikas e Compoñente Sur loitan polo liderato dentro do Top-10, mentras Lukas trata de remontar a penalización da 2ª etapa e colócase no posto 20 a 12 puntos da cacheira da xeral.

Ata 5 apostantes acadaron os 50 puntos en Sarnia. Verucido, Sarabia, Beocha, Víbora e Modesto son aspirantes ó título de primaveira e sitúanse no Top-10 da xeral.

Julio e Jose Lopez suman 49 puntos nunha xornada na que chegar a 50 non foi nada doado. Julio comparte o podio con Beocha e Sarabia. Jose Lopez ( que tivo pleno durante unha hpra) achégase ós 10 mellores e queda na posición 14.

Estas son as mellores puntuacións en Sarnia. Se queres coñecer máis do acontecido na 3ª xornada da Liga de Primaveira, pica no enlace embaixo exposto.

Na OjeteQuake 2022 volveu saltar a lebre ben cedo, cara a 01:30 da madrugada, cando un sismo de 5,7 de magnitude ó carón das Illas Kuril. Ningún dos tremores do día superou a cota acadada na liña que une Rusia e Xapón. A mellor colocada foi Mina, a quen lle faltou subir un anaco a magnitude para redondear o resultado. Oscar entrou segundo da etapa cunha apostas dende o este de China. Detrás del, Jose Lopez situóuse no sur das Illas Fox e Bar Pequeno, que marcou unha zona do noroeste do Mar de Bering. Xowi e Breogán77 compartiron a aposta na Illa Miyakojima e superaron os 440 puntos nesta 3ª etapa.

Kaltxon segue na cima da clasificación e mantén unha media impresionante, superior ós 450 puntos por xornada. Belenchis desaparece do segundo lugar por incomparecencia. Julio, Budainca, Balboa e Víbora seguen a sua estela. Breogán77, Verducido, Punteiro, Popolo e Oscar completan o Top-10 da xornada sísmica.

Se queres indagar no acontecido na 3ª etapa da Liga OjeteQuake deste 2022, preme no botón embaixo estas letras.

Saúde e sorte!!!

Sarnia é a localización para a desputa da 3ª etapa da IX Liga de Primaveira en Ontario. Atópase na beira sur do Lago Hurón e semella ter unha grande contraste climática que non precisa moito tempo para trocar de súpeto as condicións meteorolóxicas. Despois dunha semana de chuvia e neve intermitente engadido ás baixas temperaturas e os refachos de vento moderados, seica o domingo chega a primaveira a Sarnia.

As apostas en temperatura máxima van dende os 20 ata os 28º C., significativamente maiores ós derradeiros días. Tamén as temperaturas mínimas ascenden e as apostas atópanse entre os 10 e os 15º C. Máis da metade d@s apostantes escolleron xornada en seco, mentres entre os que se decantaron pola chuvia podemos ver apostas de ata 3 litros. Os refachos de vento están representados por valores entre os 30 e os 70 km/h.

Podemos estar ante a primeira xornada de chuvia e, co tipo de apostas recollidas semella unha xornada con moitos trocos durante o desenrolo da mesma. Non deixes de seguila ao vivo dende este enlace, a partires das 05:00 horas desta madrugada.

As apostas da terceira xornada da OjeteQuaje 2022 segue o semicirculo que se forma dende o Mar de Bering ata o Pacífico Sur, tocando Alaska, as costas de Rusia e Xapón, China, Filipinas, Indonesia, Papúa, as Illas Salomón, Fiji e o norte de Nueva Zelanda. Fora desa zona temos marcas en Mongolia, o Océano Indico en Illas Cocos e preto das Illas Mauricio, no Atlántico preto das Illas Sandwich e ata unha apostas no Mar Adríatico, no sur de Bosnia.

Grande xornada a que temos por diante e que podes seguir ao vivo dende este enlace a partires da 01:00 horas desta madrugada.

As apostas:

Saúde e sorte!!!