Tendo por diante unha xornada meteorolóxica coma a de Windsor, semellaba que non sería doado acadar unha vitoria en soidade. E tampouco é normal que nunha xornada da Liga dos Terremotos se comparta o trunfo. Sen embargo, iso foi o que ocorreu. Gañadora única en Windsor e trio de vencedores na OjeteQuake 2022.

A xornada meteo en Windsor comezou marcando unha temperatura mínima de 4º C., valor que somentes 2 xogadores apostaron o venres. A temperatura máxima tamén acadou cifras que ninguén augurou no día de aposta, chegando ata os 18º C. no mediodía. A chuvia non fixo aparición e o refacho de vento marcou 32 km/h. Este derradeiro dato de refacho non se reflexou no histórico diario, polo que tivemos que extraelo do acontecido na etapa ao vivo.

Con estes valores temos unha gañadora que estrea o seu marcador de vitorias na sua primeira tempada de competición. Belenchis sumou 56 puntazos, deixando dous puntos na temperatura e outros dous no refacho de vento. Gran puntuación que pode remedar un chisco a xornada perdida que ten ao lombo. Navega máis aló do posto 30.

Ata 6 participantes acadaron a segunda mellor marca da xornada. 55 puntos para Verducido, Sarabia, Michi, Oscar, Mina e Budainca, con diferentes zonas de flotación dentro da clasificación xeral.

54 puntos acadaron 7 meteoludópatas. Botikas, Víbora, Lukas, Breogán77, Balboa, Lume e Iru. Tamén este grupo circula espallado na xeral.

Se queres coñecer o acontecido na 5ª etapa da Liga de Primaveira en Ontario, pica no enlace que ofertamos baixo este párrafo.

Na 5ª etapa da OjeteQuake 2022 tivemos unha xornada de igualadas. Tivemos que decidir entre dous sismos de igual intensidade, 5,5 Mg. O primeiro producíuse na Illas Virxes Americanas e deixaba a vitoria sobre Oscar. O segundo, xa no final da xornada, producíuse en Tobelo, Indonesia, emplazamento clásico con alta sismicidade. Segundo o Regulamento Sísmico o escollido é o que máis preto se atope de calqueira competidor. E ese foi o de Indonesia, e a marca definíuna Sarabia, que tivo que compartir o trunfo co líder Kaltxon e con Balboa, que entra no Top-5. Este sismo producíuse nun lugar con moitas apostas acumuladas, polo que a gran maioría das puntuacións superan os 400 puntos.

Para acadar máis datos do sucedido na 5ª etapa da OjeteQuake 2022, preme no botón que colocamos baixo estas letras.

Saúde e sorte!!!

Semella que esta semana a etapa de Windsor vai ser de transición. Pero na altura na que estamos, na fase intermedia da competición, é mellor que te colla ben situado de cara á segunda parte da liga. A aparente falta de precipitación non é impedimento para ter unha xornada emocionante e competida. Ademáis, non temos que nos preocupar pola actualización da chuvia no luns (ou iso pensamos). Agardamos non ter unha sorpresa…

As apostas en temperatura máxima están moi apertadas, con valores que van dende os 14 ata os 17º C. No que atingue ás mínimas, recollemos apostas entre 4 e 8º C. Nengún atrevid@ osou engadir chuvia na sua aposta, mentras os refachos de vento oscilan entre os 26 e os 53 km/h.

Con estas apostas temos ante nós unha xornada que dificilmente poderá gañar ninguén en soidade, pero que pode modificar á clasificación xeral de cara á segunda parte da competencia en Ontario. Podes seguir a xornada ao vivo dende este enlace a partires das 06:00 horas desta madrugada.

Na 5ª etapa da OjeteQuake World Globe 2022, as apostas seguen a estar concentradas no este de Asia, con prediccións entre o Mar de Bering e o norte de Nova Zelanda. Ademáis, algunhas apostas espalladas na costa de Chile, nos arredores das Illas Sandwich do Sur, no Golfo de Bengala, no norte e no sur de Pakistán e no noroeste de Irán. A magnitude máxima apostada é de 6,1 Mg., ainda que vari@s participantes exhiben marcas de 6 Mg.

Esta etapa tamén podes seguila ao vivo dende este enlace, a partires das 02:00 horas desta mesma madrugada.

As apostas:

Saúde e sorte!!!

Cunha semana de retraso publicamos as estadísticas correspondentes ó mes pasado de abril. Coma sempre podes atopar unha comparativa do mes co mesmo mes do ano pasado e as comparativas co resto de edicións. Podemos adiantar que esta edición de Canadá bateu varios records históricos para un mes de abril. Van acompañadas polas gráficas dos mellores e peores en casa parámetro, as vitorias acadadas e as medias de puntuación. Pedimos humildemente desculpas polo retraso, ademáis de chegar tarde.

Saúde e sorte!!!

A 4ª etapa da IX Liga de Primaveira estivo marcada pola incerteza nos datos achegados ao vivo. Non tivemos constancia da cantidade de chuvia, nen sequera de se estaba a chover ou non. Tivemos que agardar ata as 13:00 horas do luns para coñecer os resultados finais en Brantford. E seica foron chocantes para a maioría de participantes…

A temperatura máxima quedou moi por baixo do apostado pola maioría, marcando 9º C. na madrugada e na tardiña. Ninguén baixara dos 10º C., polo que a perda foi xeralizada. A mínima sí que estivo no marco das prediccións e acadou un valor de 5º C. na mañanciña do domingo. No que atingue ao vento, o histórico amosa un incremento no visto ao vivo, dende os 33 ata os 38 km/h. definitivos. Pero para actualización máis radical foi a da pluviosidade, onde o histórico dí que se recolleron máis de 20 litros de chuvia.

Con estes resultados sinalamos a Punteiro coma vencedor da xornada en Brantford. 49 puntos que fan pensar en que Ontario é un bo lugar para a chuvia. Na s derradeiras duas xornadas con chuvia dificilmente se acadaron os 50 puntos. Punteiro tiña a mellor marca de chuvia con 12 litros. Tiña unha das apostas máis baixas en temperatura máxima, que o beneficiou. A mínima tivo unha perda de somentes un punto e a actualización final fixo que mallara o refacho. Chega ata a 5ª praza a só 3 puntos do liderato.

Con 46 puntos entraron Landrán e Lukas. O primeiro colócase ás portas do Top-10, a un só punto do peche. O caso de Lukas é curioso pois marcha no posto 7 pero que ademáis ten penalización na 2ª etapa. Sen o retraso estaría líder con 2 puntos de adianto. Nen@s, hai que ser puntuais…

Con 44 puntos asoman Julio e Sarabia, que empatan con Botikas na 2ª praza da xeral a somentes un punto do líder. Os dous tiñan marcas altas en pluviosidade, que semella que se adaptan ben ó clima de Ontario.

42 puntos obtiveron Xowi, Verducido, Marius, Botikas e Belenchis. No Top-10 atopamos a Verducido, Botikas e Xowi, mentras Marius trata de achegarse ata os postos de honra da xeral. Belenchis, cunha xornada menos navega máis aló do posto 30.

Se queres indagar no acontecido na xornada de Brantford, pica no enlace embaixo estas letras.

Polo que respecta á OjeteQuake 2022, o sismo máximo localizóuse no sur de Xapón, nunha das moitas illas volcánicas que salpican o Mar de Filipinas. E a un só punto de latitude quedou Víbora de mallar o epicentro. En primeira instancia alegóuse unha magnitude de 5,6 que foi retocado ata os 5,5 Mg. Coincidía en magnitude con outro sismo ao norte das Illas Salomón e con puntuación máxima para Balboa, pero o sismo máis cercano era o de Víbora polo que foi o escollido, segundo a normativa de competicións sísmicas. 493 puntos acadou Víbora, que se eleva ata a terceira praza da xeral.

Breogán77, Michi, Popolo, Rasta76 e Bar Pequeno superaron os 470 puntos e todos eles encádranse entre os 15 primeiros da clasificación sísmica.

Para coñecer máis detalles do acontecido na 4ª etapa da Liga dos Terremotos de 2022, pica no enlace que deixamos baixo este párrafo.

Saúde e sorte!!!