A XI Liga da Inverneira de eltiempoentuojete estivo marcada pola intriga que se mantivo ata a etapa final en case tódalas zonas da clasificación xeral. Non houbo descanso nin tregua para a maioría de competidores nas 26 xornadas que compoñían o desafío. As batallas foron contínuas por mellorar unhas posicións que a miúdo semellaban improbables de acadar pero que nalgúns casos a constancia tivo a súa recompensa. Así é esta competición. Non darse por vencido nunca, ainda que as posibilidades sexan mínimas. Sempre se pode topar un burato onde a mellora se faga realidade.
Neste resumo imos falar poco daqueles/as que non xogaron todas as xornadas en desputa, pois están en desigualdade de condicións, pero sí imos lembrar aquelo que fixeron ben. Lume, Bar Pequeno e Lukas obtiveron cadansúa vitoria a pesares da súa inconsistencia na asistencia. Coma sempre, agardábamos máis e contamos coa súa presencia en próximas competiciós meteorolóxicas. O mesmo lles desexamos a Punteiro, Pájaro, Balboa, Mingos e Lendoiro Centollo. Contamos con vós!!
No posto 24 rematou Denodeno, non é para botar foguetes pero sumou unha nova vitoria e de cara a primavera e o verán sempre troca o chip e podémolo ver nos postos dianteiros.
Kalandrakas chegou ata o posto 21 pero sen trunfos, polo que lle ten que quedar esa espiña cravada que poderá resarcir nas seguintes citas.
M.B. Joaquín remata no Top-20 con 3 vitorias en soidade. Moit@s firmarían esta situación. Gran actuación ainda que con merecimentos para estar máis alto na xeral.
Rasta na praza 19 somentes pode presumir dunha vitoria compartida, iso sí, con 59 puntazos, ainda que se agarda algo máis deste competidor. Xa virán tempos mellores!!
A Kaltxon faltóulle consistencia e sobróulle penalización. Gran xogador do que agardábamos un Top-10 como mínimo. As dúas vitorias saberanlle a pouco, igual o 18º posto final.
Breogán77 tivo unha traxectoria errática vagando pola zona media da xeral e remata no 17º posto, inferior a quen se presupón “máxico” polo pleno que fixo non fai moito.
Rasdgar tampouco atopou a comodidade na competición, e iso que amenceu con vitoria en Corrubedo, presaxiando máis altas metas. O final, 15º posto e duas vitorias de etapa. Ainda que sempre pode ser mellor.
No 14ºposto rematou Modesto, o noso Fausto particular, que semella resultou timado polo diaño. Na zona mediocre e sen vitorias, a súa é unha edición para esquecer e pensar no futuro.
Michi rematou no 13º lugar. Estivo máis arriba pero rematou frouxo. Seguro que agardaba estar entre os 10 mellores pero as tres vitorias, duas delas en soidade de certo que lle adozaron esta competición e devece por seguir sumando.
A Víbora compricáronselle ben cedo as súas posibilidades. Rematou forte e remontando pero o Top-10 cotizaba alto e somentes puido acceder ó 12º posto final. Frouxo para un excampión do que se agardaba moito máis que dúas vitorias.
Mal sabor de fuciño lle tivo que quedar a Xowi, quen mantivo durante case toda a Liga o status de Top-10 e viu como se esnaquizaba o seu soño na derradeira etapa. Porque iso de marchar sen trunfos foi a gota que colmou o xerro.
Entramos de cheo no Top-10 e xa podemos mirar a cunca medio chea. Compoñente Sur somentes acadou unha vitoria, pero entrar nos 10 mellores na derradeira xornada ten que ser glorioso, despois de media Liga tras deste obxectivo. Pulo de confianza de cara a novos retos.
Sarabia tivo un final de competición compricado, con resultados por baixo do amosado durante todo o primeiro ciclo. De optar ó 5º posto a loitar por non perder o Top-10. Ainda así gran edición para esta campiona que acadou a 9ª praza e 2 satisfactorias vitorias.
Despois dun gran inicio de Liga e manterse no Top-10 durante 18 xornadas, Landrán tivo un traspés no Alto do Cebreiro que sepultou as súas esperanzas de loitar polo título. Pero non se viu abaixo e continou a pelexar ata volver o Top-10, rematar forte e facerse cun 8º posto e unha vitoria de etapa. Sempre agardamos máis.
O de Popolo é un tema aparte. Na etapa 22 estaba no 3º chanzo da clasificación, xa lonxe dos 2 mellores pero a 6 puntos de Beocha, a súa depredadora final. E non se lle ocorreu outra cousa que chegar tarde. Ademáis de perder o podio metéuse na gaiola dos lobos, onde, convertido en ténue faisca, foi papado por temidas bestas. Semellaba o seu mellor resultado en anos, pero tivo que conformarse cunha 7ª praza e sen vitorias. Debería tomalo coma punto de inflexión.
Verducido era outro dos máximos aspirantes ó trunfo final, ou, cando menos, ó podio. E alí se mantivo durante o 1º terzo da Liga, ainda que o seu 2º terzo deixou moito que desexar e incluso estivo fora do Top-10 unhas semanas. Recuperou no derradeiro terzo para finalizar 6º, posto que non o convence ainda que leva 2 vitorias no peto. Haberá que agardar outra oportunidade.
Top-5 para Mina que perdeu o 4º posto na xornada final ante unha das sensacións da presente edición. Mantivo durante toda a Liga a condición de Top-10 e na xornada 17 dou un salto cualitativo para ingresar entre os 5 mellores e non deixar o posto de honra. Volvemos ver a competidora que tanta loita ofreceu en tempos pasados. Volveu dar coa tegra para a predicción e agardamos non a perda en tempos futuros. Ademáis, engade 3 trunfos na súa colección.
Julio non tivo un bo inicio de liga, pero xa cara a xornada 9 atopou o seu sitio entre os 10 mellores e despois colleu espazo no Top-5 e semellaba ameazar os postos de privilexio. Un despiste na etapa 19 retrasóuno ata a 8ª praza. Pero non se rendíu e seguíu na loita ata acadar unha gran 4ª praza na derradeira xornada, que levou sobradamente. E a piques estivo de levar praza no podio. Gran tempada, con 5 vitorias, 4 delas en soidade e un pleno dos que poucos se fan. Se non fora polo erro no Cebreiro (etapa que soterrou os soños de moit@s) veríamos onde podía chegar. Xa está entre os grandes. Só un paso máis…
Beocha acada un podio máis na súa carreira. Só lle falta dar a estocada final e levar pra casa algún dos trofeos de eltiempoentuojete. Nesta edición, foi das máis regulares da competición, sen altibaixos destacables e sen perder nunca o Top-10. Apretando no tramo final para sumar outro podioe manter a esperanza de entrar no Olimpo meteorolóxico amateur. Engade ademáis unha vitoria de etapa que a mantén alta no histórico. Adiante e máis aló.
26 puntos por riba, o que da conta do nivel dos 2 primeiros está Botikas. Na súa liña de sempre, sen deixar o Top-3 en todo o concurso, desta vez non puido enfrentarse ó delirio predictivo de Magor na chuvia. Chegou a estar a 18 puntos da lideresa pero non se rendíu, ofrecendo etapas de alta calidade e unha remontada case imposible que o levou a ter opcións nas derradeiras xornadas, onde outros xa tirarían a toalla e o albornoz. O seu espíritu de loita foi inspirador e ofertou o de sempre: batalla de alto rango da primeira á derradeira xornada. Non debe estar contento pero sí orgulloso do traballo feito e o espectáculo mostrado nas 4 vitorias conseguidas.
E como colofón, a sensación desta XI Liga da Inverneira en Galicia. Magor fixo da predicción pluviométrica un arte que a tivo coma lideresa destacada durante gran parte da competición. 18 etapas coma cacheira e referente desta edición non é dicir pouco e falo do alto nivel competitivo que exhibíu. Dende o mítico machetazo en Lira xa non deixou a posición de privilexio. Cada vez que ameazaba chuvia, o resto de xogadores tremían coma o vimbio. Pero non só con acerto en chuvia vences nunha contenda deste nivel. Tódolos seus parámetros teñen unha estadística meticulosamente oportuna. Seguramente ainda non se deu conta do compricado que é vencer a xente condagrada coma Botikas ou Verducido, máis sendo case unha descoñecida sen experiencia contrastada, pero o feito e que escribíu unha páxina dourada na Biblia de eltiempoentuojete. Pode que non sexas consciente, pero isto é toda unha fazaña. Noraboa!!
Non dispoñemos de tempo nestas datas para ofertar as estadísticas desta edición da Liga da Inverneira, pero non deixaremos de preparalas en canto sexaible. Mentras traballamos para unha nova edición da Liga de Primaveira, da que máis cedo que tarde ofreceremos noticias. Namentras, preparádevos para a nova competición. Saúdos amorosos dende eltiempoentuojete!!
