Xornada chuviosa na 4ª etapa da X Liga de Primaveira no seu primeiro contacto con terras itálicas do norte. O Lago de Como foi testigo do troco no liderato da xeral e do ascenso e descenso de moit@s meteoludópatas, coa chuvia coma protagonista, xunto a un vento frouxo e unhas temperaturas baixas e con pouca amplitude térmica.

A noite comezou chuviosa e xa de mañanciña o pluviómetro sinalaba máis de 15 litros, cunha temperatura alta que situou a mínima en 8º C. No mediodía acadábase a máxima de chuvia con 17 litros redondeados e unha temperatura máxima de 12º C. O refacho tamén marcou o seu máximo antes do mediodía cuns miserables 7 km/h.

Con estes datos somentes temos a tres supervivintes da masacre que acadaron os 50 puntos. Trio de gañadores composto por Landrán, Lume e Marius. O novo líder, Landrán, foi o que menos puntuación anotou na chuvia dos tres trunfadores, pero o resto dos seus parámetros estivo moi equilibrado. 14 puntos en auga, 18 en temperaturas e outros 18 en vento colócano como cacheira da xeral e, de non ser impuntual, pode ser un novo inquilino no Olimpo meteoludópata. Veremos se os deuses son puntuais ou non. Marius entra no Top-10 á conta dunha boa aposta en chuvia e puntuacións medias en temperatura e chuvia. Engade unha vitoria e reclama un lugar entre a élite. Haberá que seguilo con atención. E xa facía tempo que non viamos gañar a Lume, entre as grandes de vitorias históricas. A mellor puntuación en chuvia pero mediocre na temperatura máxima e no vento. Posto 14 para ela pero que pode ser un punto de inflexión para esquecer o mal resultado da Inverneira.

49 puntos para Kaltxon, que despois de comezar frouxo semella coller o ton no Adriático e xa o vemos acampado no Top-10. Para mal comezo o de Popolo, frouxo e penalizado que sae da poza séptica para chegar o 17º posto e reivindicar un status que o presenta como gañador da 2ª edición da competición de Primaveira.

Tamén iniciaron con mal pé os que ostentan 48 puntos. Modesto crece coma as estrugas de primaveira e empata na derradeira praza do Top-10. Balboa ven dun inferno de malas puntuacións e semella dar un paso adiante nesta edición.

Estes foron os sete mellores nesta primeira xornada italiana. Para coñecer tódolos detalles do acontecido en Falchetto, no Lago di Como, pica no enlace que aparece baixo este texto.

Sorte e clima!!

A 4ª etapa da Liga de Primaveira lévanos ata a 1ª xornada en terras italianas, no Lago di Como, fogar de Donatella Versace, Madonna ou Berlusconi, polo que a zona está rodeada do luxo dos seus paisaxes e o das grandes fortunas que aquí teñen a sua segunda residencia. As axencias meteorolóxicas sinalan tempo chuvioso, con temperaturas primaverais e vento frouxo. Estas son as prediccións dos meteoludópatas de eltiempoentuojete.

No que se refire ás temperaturas máximas, van dende os 11 ata os 18º C. Polo que atinxe ás mínimas, están entre os 3 e os 13º C. Semellan bastante abertas as apostas neste parámetro. Polo que respecta ás precipitacións, temos valores dende os 3 ata os 21 litros, sen acordo posible. Os refachos de vento están representados dende os 9 ata os 32 km/h.

Á vista de apostas tan dispares agárdanos unha xornada moi especial e con oportunidades de mellora para tódolos gustos. Recomendamos vivila en direto dende este enlace ao vivo a partires das 02:00 horas desta mesma madrugada e dende a mañanciña do domingo en horario continuado ata o remate do día. Semella que as diferenzas van marcar o desenrolo da propia Liga, polo que mellor non perder conta do que suceda.

As apostas:

Saúde e sorte!!

As Covas de Cerovac foron o escenario da 3ª etapa da X Liga de Primaveira e a despedida de terras croatas cara Italia. E coma en calqueira cova, as temperaturas foron frescas, estivemos cubertos da chuvia e o vento foi testimonial.

A temperatura mínima non baixou moito na madrugada e houbo que agardar ata a derradeira hora do día para ver a mínima. 1º C. negativo foi a marca acadada no remate do día. A máxima, como é normal, rexistróuse no mediodía e somentes chegou ata os 10º C. Non se constatou nengunha precipitación e o vento foi moi frouxo, acadando o seu refacho máximo na madrugada con 22 km/h.

Varios foron os líderes ó longo do día, pero houbo que agardar ata o final para o resultado definitivo. O factor decisivo foi a temperatura mínima, que despois do periodo de entre lusco e fusco descendeu de forma abrupta dende os 6º C. ata o -1 final. O vencedor final en soidade con 57 puntos foi Verducido, que mallou a temperatura máxima e perdeu 1 punto no resto de parámetros. Segunda vitoria consecutiva que lle da o liderato en soidade ante o desafío en terras do norte de Italia.

56 puntos foron os sumados por Víbora, cunha aposta moi similar á de Verducido pero perdendo 2 puntos nos refachos de vento. Segunda praza coa que obtén tamén o segundo lugar na xeral, compartido con Botikas.

Beocha acada a 3ª praza con 55 puntos, que a leva ata a 4ª praza na clasificación xeral a 2 puntos dos seus predecesores e a 3 do líder. Boa xornada tamén para ela co premio do Top-5.

54 puntos engaden no seu marcador Botikas e Denodeno, descoñecido nesta edición, con Top-10 despois de 3 xornadas. 6ª praza a somentes 4 puntos do liderato. Semella que quere dar a sorpresa. O antigo líder, Botikas, baixa un escalón ata a segunda para seguir dando guerra.

Con 53 puntos temos a M. B. Joaquín e a Landrán, con boa xestión das temperaturas. Landrán chega ata a 5ª praza e M. B. Joaquín é a outra sorpresa da xeral co seu 8º posto. Se non penalizan por tardosos poden ser unha boa alternativa ás “vacas sagradas”.

52 puntos foron os acadados por Compoñente Sur, ainda que se acertara máis nas temperaturas acadaría mellor posición na xeral. Ainda así entra no Top-10 a 6 puntos do liderato e semella adaptado ó mar Adriático.

Estas foron as 8 mellores puntuacións nas Cova de Cerovac. A destacar tamén a esa minoría que semella erraron na localización da etapa, entre eles o ex-líder Bar Pequeno, que baixa ata a 12ª praza compartida. Recordar que no extranxeiro a geolocalización da estación en xogo é o 50% do éxito. No será un problema grande nas xornadas en Italia, pero sí cando entremos en Eslovenia, na que os toponímicos volveran a compartirse con Croacia, Bosnia, República Checa, etc.

Se queres acadar tódolos datos surxidos das Covas de Cerovac, en Croacia, pica no enlace que ofertamos baixo estas letras.

Saudos e clima!!