Etapa a de Lira sen grandes sobresaltos, con altas puntuacións na maioría dos casos e onde poucos trocos se produciron nos valores recollidos ó longo do día.

O primeiro dato en estabilizarse foi o da temperatura mínima, que quedou en 15º C. redondeados dende o inicio da etapa, na madrugada. Cara o abrente foi o refacho de vento o que deixou o valor definitivo con 31 km/h. A sorpresa, por dicir algo, foi o reconto de chuvia recollida, que chegaba a 1 litro nesa franxa horaria. E na hora do vermú acadábase a temperatura máxima definitiva cun valor de 16.6º C., redondeando a 17º C.

O que non se agardaba con estes valores tan mornos era un vencedor en soidade. As estapas planas en Lira, ó carón do mar, adoitan ter multitude de gañadores a compartir a vitoria. O trunfo semella estar baseado en mallar o refacho de vento, amais dunha boa combinación do resto de parámetros. Os que prediciron o litro de auga non aproveitaron a situación.

Coa puntuación máis alta, 58 puntos, temos o mesmo gañador da anterior etapa. Verducido perdeu un punto nas temperaturas e outro na pluviosidade, pero cravar o refacho déulle a vitoria final. Esta segunda vitoria consecutiva achégao a só 3 puntos do liderato e a 1 do segundo posto, amais de alonxarse un pouco da 4ª clasificada. Apértase a xeral pola parte alta.

Un punto menos, 57, fixo Magor, debutante na competición que estivo a punto de levar o trunfo cunhas grandes prediccións, semellantes a Verducido pero con un refacho distinto que lle fixo perder ese punto que os diferenciou. Circula polo posto 26 pero collerá folgos para próximas datas.

Detrás del, con 56 puntos, Xowi, Popolo, Lukas, Botikas e Punteiro. Botikas segue no 2º lugar e rouba un punto ao líder, do que está a só 2 puntos. Xowi segue ó pé do Top-10 pero agora a somentes 1 punto da porta. Popolo está nese grupo que tamén se achega o Top-10 e mantén unha boa xeira de resultados. Lukas peta na porta do Top-20 recuperándose dos malos resultados das derradeiras 2 xornadas. O mesmo comentario para Punteiro, ainda que este ven de entrar no Top-30 da xeral.

E ata un total de 10 xogadores acadan os 55 puntos en Lira. Rasdgar, Breogán77, Balboa, Erdogan, Beocha, Mutombo, Kaltxon, Mingos, Sarabia e Mjölnir. Longo sería explicar a vosa situación polo que podedes buscarvos nos resultados da etapa en Lira.

A Clasificación Xeral segue comandada por Kaltxon, cos lobos Botikas, Verducido e Mina pisándolle o calcañar. Tentando pechar o burato cos principais están Beocha, Breogán77, Landrán, Mutombo, Marius e Compoñente Sur, que completan o Top-10 dos mellores.

Para acadar toda a información recabada en Lira, a 9ª etapa da Liga da Inverneira, pica no enlace que deixamos embaixo estas letras.

Saudos e sorte!!

A 9ª xornada da Liga da Inverneira semella ser unha pausa despois de mes e medio de chuvia ininterrumpida coa entrada de diversas borrascas atlánticas e que fixeron da competición un inferno para uns/unhas e un exercicio de revalorización para outr@s. Pero ainda estamos a rematar o primeiro terzo do campionato e ainda que as diferenzas semellan imposibles de pechar, o certo é que pódese repetir a historia pero o contrario. Calquera pode volver a ocupar prazas de privilexio se ten o acerto necesario. E os mesmos que hoxe están no cumio mañán pódense ver coa soga na gorxa. Todo isto é para que non vos desanimedes se estades nunha posición que non vos gusta. Todo pode mellorar, preparando ben as etapas e, coma consello, non deixar para última hora a materia do exame. Cántas veces volo dixo o profesor…

Pois ben, hoxe é deses días para non perder moitos puntos, nunha xornada, a de Lira, aparentemente sobre seco, sen moito vento e con temperaturas agradabeis e sen moita dificultade preditiva. Pero precisamos un/unha gañador/a e iso xa é bastante aliciente para desputar coma sempre (ou máis) outra marca na culata do revólver.

As temperaturas máximas oscilan entre os 16 e os 20º C. As mínimas encádranse entre os 9 e os 15º C. Pouca auga nas casiñas dos apostantes. Somentes 4 xogadores apostan por algo de chuvia, entre 1 e 2 litros cunha aposta temeraria de 6 litros. Polo que respecta órefacho de vento, atopamos valores dende os 9 ata os 51 km/h. É o parámetro máis aberto de todos.

Se pensas que podes levar o trofeo no concello de Carnota ou rebaixar ou aumentar a renda sobre os persecutores, non podes deixar de seguir a etapa ao vivo dende este enlace a partires das 02:00 horas desta madrugada. Durante o domingo estaremos verificando datos ó longo do día coa información máis actualizada. Tamén podes consultalos valores recollidos no menú principal, no Acceso rápido. Buscamos un nome e pode ser o teu!!

As apostas:

Saúde e sorte!!

A 8ª xornada da X Liga da Inverneira si que deixa desta vez grandes diferenzas tanto no local coma na Clasificación Xeral. A disparidade de apostas víuse reflectida nos resultados finais da etapa coma nun antes nesta edición. O pequeno grupo de meteoludópatas que marcara máis de 15 litros foi o que saiu encumbrado na torre da homenaxe mentras que os de baixa cantidade de auga foron condenad@s ás mazmorras a máis ou menos profundidade. Tres dos ocupantes dos postos de honra no Top-10 foron desterrados cara a chaira máis alá das fronteiras dos heróes. Pero poderán obter a gracia do perdón se son templados e honorables nas próximas datas. Coma o Cid Campeador, poderán voltar se demostran a súa valía predictiva. Neste caso hai que salientar a Landrán, que foi represaliado con unha penalización cando cabalgaba 7º e remata o asedio á Muralla na 6º praza. É un dos heroes da semana, ainda que sen os 5 minutos de retraso estaría a loitar polo liderato. Épico de todas formas.

Pero todo isto tivo consecuencias. A máis importante, o burato existente entre os catro primeiros da xeral e os demais. 12 puntos co resto da comitiva que terá que loitar duro para recuperar o perdido nestas 8 primeiras xornadas.

Ademáis hai que contar que entre o Top-5 da xeral temos a catro das bestas pardas da competición histórica, curtid@s en mil batallas que se asentan nas grandes lendas de eltiempoentuojete. Preto de 20 títulos oficiais e incontables podios xuntan entre Botikas, Verducido, Mina e Beocha. Se eu fose Kaltxon, o líder, pecharía os ollos ante as estadísticas d@s mercenari@s que lle seguen o rastro. Non mires atrás, Kaltxon, nin para a historia nin para os nomes. E sobre todo, no chegues tarde ás apostas…

(Ver estadísticas das competicións)

A etapa en Muralla comezaba sen chuvia, con vento medio e marcando a temperatura mínima final, establecida en 12º C. Cara o abrente rexistrábase apenas medio litro de auga, un vento de 47 km/h. e 13º C. de máxima. A partires dese intre comezaba a mudar a situación e se iniciaba a xornada propiamente dita. Cara as 15:00 horas a máxima chegaba a 15º C. e acumulábase o primeiro litro de chuvia. O vento acadaba os 67 km/h. E chegou Elisa… Ás 22:00 a temperatura tentaba chegar a 16º C., o vento sopraba a 71 km/h. e a chuvia acumulada era de 17 litros. A derradeira hora foi pior. Non se acadaron os 16º C. pero a auga chegaba ata os 25 litros e un refacho a falta de 10 minutos situaba o refacho en 78 km/h., onde case ninguén chegara.

Con estes datos obtemos un gañador en soidade con 55 puntos. Verducido perdeu 2 puntos na temperatura, 1 na pluviosidade e outros 2 no vento. Consistentes apostas que o levan ata a 3ª praza da xeral dende a 9ª que ocupaba. Queda a 6 puntos do liderato á conta do refacho rexistrado a 10 minutos do final, que lle devolveu 3 puntos de renda a Kaltxon. Ainda así, xa é unha ameaza constatable, sobre todo mirando o seu currículo histórico.

Na segunda praza, con 53 puntos atopamos a Beocha, outra vaca sagrada da competición. Perdeu 5 puntos na chuvia, 1 no vento e outro na temperatura. Ocupa a 5ª praza da xeral con terreo por recuperar. Pero ven do posto 19, polo que se pode agardar calqueira cousa.

52 puntos abtiveron os cacheiras da clasificación, Kaltxon e Botikas, con valores de auga preto dos 20 litros e ventos altos. Kaltxon mantén a posición de privilexio conseguida en Cequeliños e xa é aspirante ó título desta edición. Botikas sempre será ameaza, aspirante máximo cada ano tendo coma cualidade a de non errar case nunca.

51 puntos para Rasta, que meteu o uñeiro entre os grandes da Liga. Sube o posto 22 dende o 33. Xornada de espertar para é. Debe aproveitar este momento e non deixalo nunha anécdota.

Mina leva 50 puntos de Muralla, que poderían ser máis de non errar clamorosamente na temperatura mínima, onde deixou 4 puntos. Pero está na 4ª praza a 6 puntos do liderato e tamén ten a estantería chea de premios, polo que será intimidante ata o final da competición.

Estes son os únicos xogadores en superar os 50 puntos. Destacable o burato aberto co resto, onde temos que chegar ata os 40 puntos para atopar xogadores. Alí están Erdogan, que orbita no posto 26 e Mutombo, que esta semana entra no Top-10 pola parte fronteiriza.

Para acadar o resto dos datos recollidos en Muralla nesta 8ª etapa de competición, pica no enlace que ofertamos baixo estas letras.

Saudos e sorte!!

E agora chega Elisa, unha nova borrasca importante que vai deixar de novo en alerta amarela as costas do norte de España. Entrou onte e vai estar traballando preto de nós durante o fin de semana e o comezo na nova. Para nós, que facemos parada e fonda este domingo en Muralla, no concello de Lousame, pode ser outro episodio máis para os amantes da chuvia e o vento forte. Sen avisos vermellos pero nunha zona, entre as rías de Arousa e Muros, onde a chuvia é constante e o vento pode acadar valores altos.

Como adianto dicir que temos 5 penalizad@s e outras tantas ausencias. Un dos penalizados, Landrán, ocupa praza no Top-10 e chegou somentes 5 minutos tarde, suficiente para cargarlle 10 puntos negativos. Pero sendo xornada de chuvia pode estar atenuado, da mesma maneira que Lukas a semana pasada en Cequeliños. Se non falla moito pode seguir entre os mellores e camiño inda falta.

As apostas en temperatura máxima van dende os 12 e os 19º C. amplitude suficiente para crear diferenzas. Pola parte das mínimas, van dende os 8 ata os 14º C. No eido da pluviosidade, grandes diferenzas entre apostaspredín abondosos movementos na xeral. Hai valores de chuvia dende os 0 ata os 24 litros, cunha aposta arriscada a priori de 62 litros. Moita marxe no canto dos refachos de vento, con prediccións que parten dos 10 km/h ata os 81 km/h.

Con estes valores temos unha gran variedade de resultados posibles que deberías seguir na xornada ao vivo dende este enlace a partires desta madrugada, cara as 02:00 horas. E en tempo continuado dende a mañanciña do domingo ata a fin da xornada. Tamén podes facelo dende o enlace existente no Acceso rápido do menú principal.

As apostas:

Saúde e sorte!!!