Fin de festa en Xesteiras, concello de Cuntis, onde se desputaba a etapa final da X Liga da Inverneira de Galicia e xa coñecemos os resultados definitivos da competición senlleira de eltiempoentuojete.

As primeiras horas de competición deixaron varios parámetros definitivos ata o final do día. A temperatura mínima baixou ata os 10º C. n a primeira hora, do mesmo xeito que o refacho de vento, que acadou unha cota de 61 km/h., marca moi por riba do apostado pola maioría. A chuvia caía de seguido e ás 04:00 horas xa acumulara 6 litros no pluviómetro. Así se mantivo ata o mediodía, cando a temperatura máxima chegaba ós 13º C. e a chuvia engadía 2 litros máis no contador, sinalando os 8 litros que xa serían definitivos. No final de etapa ainda subiu a temperatura pero sen chegar a modificar os valores acadados. A chuvia estivo no límite para trocar detalles na xeral e incluso trocar os vencedores de etapa, pero ese feito non se produciu.

Deste xeito atopamos unha vitoria grupal con 4 participantes no cumio co 52 puntos. Tres deles involucrados no Top-10 da xeral. Verducido reduciu as diferenzas co líder Botikas pero sen premio. Defendeu sen problemas o posto con Kaltxon, acadando outro subcampeonato. Beocha tamén defendeu posición e remata nunha 4ª praza con bo sabor de boca vendo o desenvolvemento da liga. Xowi desempatou con Landrán, ainda que se chovera somentes 0.1 ltros máis perdería a vitoria e a praza. Non sucedeu e remata na 6ª posición. Polo Top-20 Julio sí que acadou o seu obxectivo de rematar dentro do mesmo. Perseguíu a vitoria co premio do 20º posto da xeral.

Con 51 puntos chegaron á meta Punteiro e Modesto. Punteiro remata 11º, unha posición impensable para el na primeira parte da Liga. Gran resultado pola recuperación na segunda volta. Modesto sube ó posto 17 con pena de non chover máis e subir un pouco máis na que foi unha competición decepcionante para el. Os dous rematan forte e melloran.

Breogán77 e Kaltxon finalizaron con 50 puntos. Kaltxon mantivo a 3ª praza pero non poido chegar ata Verducido. Podio para o que será aspirante a títulos nas próximas competicións, con grandes sensacións e carencia de medos. Breogán77 defendeu o derradeiro chanzo do Top-10 co coitelo nos dentes e, aparte da clasificación, leva un pleno, formando parte dun club m´ñais que exclusivo en eltiempoentuojete.

48 puntos obtiveron Popolo e Víbora, levando a súa rivalidade ata o extremo. Non puideron con Punteiro pero sí con Compoñente Sur que certificou un baixón nas derradeiras etapas. Rematan compartindo o 12º posto, cunha difícil de igualar paridade nos seus marcadores.

Estes foron os dez mellores xogadores por puntuación. Para acadar máis datos pica no botón de enlace que ofertamos embaixo do resumo final da competición.

Pequeno resumo

Botikas volve gañar a Liga da Inverneira despois dun ano no segundo posto e desempata a igualdade de trunfos con Verducido, co que intercambia posición respecto a edición anterior. 4 Ligas da Inverneira o convirten no mellor xogador en Galicia, por riba das 3 de Verducido. A súa sala de trofeos foi ampliada e non semella que baixe de nivel. Se acaso somos os demais os que temos que mellorar.

Verducido acada un novo subcampeonato. Non puido resistir os derradeiros embates do agora tetracampión e tense que conformar con seguirlle a matrícula. De seguro xa está a pensar nas novas edicións e promete vinganza.

Kaltxon confírmase coma aspirante ó trono dos dous multicampións dando un paso adiante que agardemos non sexa unha ilusión. Gran tempada para el, a da súa confirmación coma duro opoñente.

Beocha non pudo con Kaltxon para acadar un novo podio pero defendéuse con forza de Landrán e Marius e debe estar satisfeira do conseguido. Forte nas etapas de chuvia torrencial agardará outra oportunidade para atrapar un título que se lle resiste.

Marius tamén deu un paso adiante para consagrarse coma aspirante, superando a moitas vacas sagradas da competición. 5º posto do que debe sentirse fachendoso. Se lle queda unha espiña cravada é a de non levar unha vitoria.

Xowi rematou forte, loitou o pudo nestas derradeiras xornadas para acadar o mellor posto posible. Do que tamén pode estar orgulloso é das 4 vitorias ligueiras, feito que non se pode esquecer.

Landrán finaliza 7º con 2 vitorias. Sería para festexar se non tivera 2 penalizacións enriba que lle darían a 4ª praza. De ser máis constante loitaría polo podio ou incluso a vitoria final. Pero o dos retrasos pódese remediar. Aquí hai aspirante.

Para Mina a 8ª praza seguro que lle sabe a pouco, pero vendo cómo se desenrolou a Liga, debería estar orgullosa. Top-10 e dúas vitorias para ela.

Balboa apostou sen medo durante este desafío e ten o premio do Top-10 e 2 vitorias. Semella cada vez máis centrado e promete mellores resultados en próximas citas.

Breogán77 cerra o Top-10, ainda que o seu pleno na primeira xornada indicaba que podía rematar mellor. De calqueira maneira engade 2 vitoria no marcador, unha delas sen prezo.

Punteiro, Víbora, Popolo e Compoñente Sur regaláronnos unha loita a morte durante as derradeiras xornadas. Compo e Popolo estiveron sempre nos postos de Top-10 pero Víbora e Punteiro apareceron dende o inferno da clasificación e chegar a estas posicións non é sinxelo, polo que merecen recoñecemento.

Rasdgar remata a súa primeira competición no 15º posto, feito a aplaudir. Moi constante e sen perdas reseñables pódese ver o potencial e agardamos velo nos Top-10 de competición nas seguintes citas.

Agardábase máis de Lume, sobre todo en vitorias, pero foi unha competición dura para ela tendo que vir dende abaixo da clasificación. Tamén de Michi, Modesto e Julio, que terán que esperar para ensinar o seu verdadeiro potencial. No medio, Magor tamén amosa calidade na súa competición inaugural. De tod@s el@s queremos máis no futuro.

Saudos e clima!!

Derradeira etapa da X Liga da Inverneira e semella que Cuntis quere dar unha última oportunidade ós competidores para maquillar o seu casilleiro xeral. Nun lugar inhóspito vaise desputar esta etapa final, con choiva (moita, pouca ou nula segundo as apostas) e quizais algo de vento e moitos son ainda os frentes abertos, máis se cabe ó visualizar as prediccións na táboa de apostas.

Para as temperaturas máximas temos valores que van dende os 12 ós 19º C. Polo que atinxe ás mínimas, as apostas están entre os 7 e os 13º C. As cantidades de chuvia oscilan entre os 0 e os 15 litros. Polo que respecta ós refachos de vento, están entre os 14 e os 63 km/h.

Moito marxe en tódolos parámetros con diferenzas notables entre apostantes o que presume unha xornada caótica e con trocos contínuos, ainda que a chuvia agárdase para primeira hora, o vento tamén pero podería mudar na tardiña e as temperaturas na súa hora habitual, na madrugada e cara o mediodía.

Pola parte alta, ainda que Botikas semella ter o galardón na súa man, ten ainda un pequeno burato onde Verducido, de facer pleno, levaría o trunfo final. Moi compricado, pero coa esperanza do náufrago. Non semella que teñan esperanza de mellora Kaltxon e Beocha, pero Marius sí podería acceder ó 4º posto de mallar as súas prediccións. Xowi ainda facendo pleno quedaría un punto por tras de Marius, pero sí Landrán, que de facer pleno ou case pleno roubaríalle a praza a Marius. Se a que acerta é Mina podería chegar ó 6º posto desbancando a Xowi e Landrán. Facendo pleno Balboa quedaría a un punto de Xowi e empataría con Landrán, ainda que o desempate non lle sería favorable e ocuparía o 8º posto. No caso de Breogán77, facendo pleno chegaría á 9ª praza. Pola loita por acadar posto no Top-10, ata Punteiro dende o posto 14 ten posibilidades, con Compoñente Sur, Popolo e Víbora entre eles. Rasdgar podería acadar o 12º como mellor posición, gran resultado para o rookie do ano. Todas estas cábalas están baseadas en puntuacións máximas, ou sexa, plenos. Calquer outro resultado daría situacións inesperadas que non imos concretar agora. Pero que saibades que estas son as máximas opcións destes xogador@s.

Como podedes ver non hai nada dito ata o derradeiro minuto nesta X Liga da Inverneira de eltiempoentuojete. Se algunha xornada tes que seguir ao vivo, é esta de Xesteiras, onde se decide o devir final da competición. Podes seguir a etapa ao vivo dende este enlace a partires das 02:00 horas da madrugada (senón antes, pero hai compromisos ineludibles) e o domingo en horario contínuo dende a mañanciña ata o final do día. Esta vez sí que non o podes deixar de ver en direto!!

As apostas:

Saúde, sorte e clima!!

Intensa xornada a de onte no concello de Ponteareas para a desputa da penúltima xornada da X edición da Liga da Inverneira. Gran oportunidade que non todo o mundo foi quen de aproveitar. Ó longo da xornada houbo innumerables trocos tanto na elección do gañador coma na táboa xeral de clasificación. Onde máis loita se agardaba era na zona lindeira ó Top-10 e foi a que máis se moveu, ainda que non ó gusto de tod@s. Xornada chuviosa e con vento na que moit@s competidores se sentirán arrepentidos de non apostar máis forte. Pero as apostas fanse o venres e non sempre se pode arriscar…

A xornada comezou con chuvia intensa na que se chegou a acumular máis de 10 litros nas primeiras duas horas de competición. Tamén o vento soprou con forza na madrugada deixando o refacho máximo da etapa en 43 km/h. A temperatura mínima estancouse en 8º C. e xa non baixou dese valor. A máxima fíxose agardar ata a sobremesa, onde acadou un valor definitivo de 14º C. A chuvia foi caendo miudiño ó longo da tarde chegando ata os 18 litros redondeados xusto no fin da xornada.

Esa derradeira chuvia foi a que nos deu o vencedor en soidade en A Granxa. 57 puntos presentou Xowi, mallando a chuvia e perdendo somentes un punto en cada parámetro restante. Terceira vitoria do ano que o fai subir dende o 8º ata o 6º posto, empatado con Landrán pero coa vitoria que o fai estar por riba na xeral. Obxectivo cumprido pero con unha etapa final onde terá que loitar duro para manter a posición. Parabéns ó canadiano!!

Con 56 puntos atopamos a Balboa e Magor, con distintas ambicións e que tamén mallaron a chuvia. Balboa loitaba polo Top-10 e cumpriu. Sube ó 9º posto nunha situación xa bastante desafogada e con algunha posibilidade de atacar os postos que o preceden. Magor chega ata o posto 18, empatado con Modesto pero por riba grazas á unha vitoria mellor valorada. Terá que manter a loita pola posición pero tamén alberga posibilidades de mellora en Cuntis.

55 puntos para Kaltxon, Julio e Michi. Recorta Kaltxon as diferenzas coa cacheira da xeral, tendo a tiro de pedra o 2º posto de Verducido. Dalle opcións de cara a etapa final en Xesteiras. Michi mantén a praza 17 e achégase a Lume na 16. Derradeira opción en Cuntis. Julio, despois de gañar en Xinzo e puntuar ben en Ponteareas queda asó 2 puntos do Top-20, que semella o máximo o que pode aspirar. Xa a posibilidade de mellora é un regalo.

54 puntos para Modesto que perdeu as posibilidades de vitoria cunha mala aposta en temperatura. Debe defenderse de Magor pero ten oportunidade de ataque sobre Michi para deixar un mellor sabor de boca nunha edición que para el está a ser decepcionante.

Popolo e Rasta sumaron 53 puntos. Para Popolo vai ser unha boa oportunidade de subir posicións en Cuntis, o achegarse ós postos de acceso ó Top-10. Dura loita nesta zona de cara á derradeira cita. Para Rasta vai ser a de Cuntis unha busca da vitoria, pois non ten depredadores preto nin semella que poda depredar máis aló do posto 23 que ocupa. Pode ir preparando a seguinte edición.

Estes son as 9 mellores puntuacións de A Granxa, penúltima cita da Liga da Inverneira. Para acadar tódolos datos recollidos no concello de Ponteareas, pica no enlace que ofertamos embaixo estas letras.

Oportunidade de trocar as cousas a mellor en Ponteareas. A estación meteorolóxica de A Granxa ofrece unha xornada onde o vento, a chuvia e as temperaturas poden facer que a túa situación na táboa xeral sexa máis satisfactoria. A borrasca Mónica agasállanos cun cúmulo de posibilidades que fan desta 25ª etapa un inferno que se pode convertir en ceo se as apostas son acertadas. O centro de atención, sen desdeñar o Top-3, está nas loitas pola zona interna do Top-10, con moit@s candidatos a entrar na mesma, intencións de manterse ou incluso mellorar se as diferenzas son as suficientes. Ou preparar a cama para unha derradeira xornada intensa…

As apostas en temperatura máxima oscilan entre os 10 e os 14º C. as mínimas van dende os 3 ata os 8º C. Cantidades de chuvia variadas, entre os 4 e os 19 litros. E refachos de vento con valores entre os 21 e os 52 km/h.

Con estes datos temos ante nós unha das derradeiras oportunidades de mellora nesta X edición da Liga da Inverneira de eltiempoentuojete. Recomendamos encarecidamente o seu seguimento ao vivo dende este enlace, a partires das 01:40 desta mesma madrugada e o domingo dende a mañanciña ata o final da etapa. Moito en xogo en A Granxa!!

As apostas:

Sorte e clima!!