Fontecada fixo honor á súa historia e deixou unha etapa apaixoante en con tódolos ingredientes necesarios para seguir a xornada ao vivo ata o derradeiro suspiro. Chuvia, vento, temperaturas cambiantes, e todo, ata o final da xornada. A Clasificación xeral mudando ó longo do día, con modificacións brutais que fixeron que poucas posicións non tiveran troco co resultado final. Esta é a crónica do acontecido e as mellores puntuacións do domingo en Fontecada.

As temperaturas subían no final do sábado e a xornada comezaba con 10º C. que chegaron ata os 12º C. no abrente e se mantiveran ata a tardiña do domingo. Esta foi a temperatura máxima final. Pola mínima tivemos que agardar ata o final do día, cando o mercurio baixou ata os 7º C. A chuvia tamén caeu con forza dende o inicio da xornada, con valores dezminutais que rebasaban o litro. Chegamos ás 16 horas con 58 litros, cando a chuvia amainou. Pero non sería a cota final, pois ás 24 h. o pluviómetro amosaba os 62 litros que serían definitivos. O vento tamén soprou forte durante todo o día, acadando o seu valor máximo de 73 km/h. antes da hora do vermú.

A partir destes datos obtivemos un gañador en soidade cunha espectacular marca de 58 puntos. Punteiro mallou a cantidade de auga, inédito nestas cantidades. Perdeu somentes un punto na temperatura e outro no refacho de vento, firmando un desenvolvemento abraiante. E iso nótase na clasificación, onde pasa do 16º posto ata o 13º, moi preto do Top-10, máis apertado que nunca. Parabéns pola vitoria e pola exhibición!!

Ata os 54 puntos temos que baixar para atopar o segundo clasificado e novo líder da Liga, o máxico e incombustible Botikas. Foi dos que optou por gran cantidade de chuvia e saíulle ben. Colle o liderato con 8 puntos de renda sobre Verducido e 15 sobre o antigo líder Kaltxon. Semella que a falta de 3 xornadas volverá a alzar o título de campión.

Verducido acadou 53 puntos á conta da cantidade de auga e supera a Kaltxon no segundo posto da xeral con 7 puntos de renda positiva e 8 de negativa sobre Botikas. Veremos se ainda ten marxe para desbancar ó líder e se pode manter a vantaxe sobre Kaltxon. Isto ainda non rematou.

Popolo firma un gran resultado con 52 puntos que lle valen para subir ata o 14º posto ainda que superado polo vencedor Punteiro. Pero de estar a 24 puntos do Top-10 pasa a estar a somentes 5 puntos, polo que a melloría é evidente e isto daralle folgos cara ás 3 etapas que completarán a Liga. Gran resultado!!

Só estes 4 participantes superaron a barreira dos 50 puntos. Con 49 atopamos a Beocha, Marius e Lume, gran puntuación a tenor da xornada. Beocha mantén o 4º posto e sitúase a 12 puntos do 3º posto con 8 de marxe sobre o 5º, Marius, que mantén a diferenza con Beocha e aumenta o marxe co 6º posto de Landrán a 10 puntos. Lume segue coa súa recuperación e chega ata o posto 16 e forza suficiente para acadar o Top-10.

Ata os 45 puntos temos que baixar para atopar os 2 seguintes marcadores da etapa. Mina e Michi melloran, con Mina superando a Xowi e quedando a 3 puntos de Landrán na 6ª posición. Michi sube 2 posicións, ata o 17 e a tiro de pedra do Top-15.

Estes son os 9 mellores marcadores da épica xornada de Fontecada. Para acadar tódolos datos do acontecido na 23ª xornada da X Liga da Inverneira, pica no enlace que ofertamos baixo estas letras.

Sorte e clima!!

Penso que é indubidable que toda a comunidade meteoludópata de eltiempoentuojete esperaba unha xornada como a que se vai desputar en Fontecada, no concello coruñés de Santa Comba. Tamén creo estar no certo se digo que, despois de observar as apostas, moit@s de vós estades medorentos polo resultado que se expoña o luns, após o remate da xornada. Seica necesitabamos unha etapa deste tipo para extraer o trigo da palla e Fontecada reflexa esta convicción. Agárdase a chegada dunha nova borrasca despois de Louis, pero xa con vento de sur e, polo tanto, con temperaturas máis mornas. Mónica tamén nos trae vento forte e chuvia intensa pero vindo dende o Atlántico fará que suban as temperaturas. Tendo esto en conta, a táboa de apostas ven cumplida en todos os seus parámetros e supón para o conxunto de xogador@s unha oportunidade única de ascenso na xeral ou, Guabancex (deusa taína ou arahucana da meteoroloxía) non o queira, afundirse no abismo.

Polo que respecta ás temperaturas máximas, observamos valores que van dende os 10 ata os 15º C. No que atinxe ás mínimas, as apostas van dende os 4 ós 12º C. No apartado de chuvia recollida temos un “totum revolutum” de prediccións, dende os 14 ata os 80 litros, sendo un parámetro decisivo para mañá. No capítulo de refachos de vento tamén haj disparidade de opinións, con cifras dende os 32 ata os 89 km/h. Ainda sendo moi determinante, a cantidade de puntos en xogo é menor, pero en conxunto poderemos ver moitas diferenzas nas consecuencias finais.

Sempre dicimos que non te podes perder a transmisión da xornada, pero desta vez non esaxeramos cando urximos de maneira explícita a seguila minuto a minuto (os datos son dezminutais). Fontecada pode cambiar o devir da historia desta edición da Liga da Inverneira, sendo un lugar onde a chuvia é credo. Podes seguir esta xornada ao vivo dende este enlace a partires da 01:40 desta mesma madrugada e dende a mañanciña do domingo ata o remate da competición. Todo está en xogo no concello de Santa Comba.

As apostas:

Saudos e sorte!!

O título deste artigo vai dirixido a Kaltxon. Xa o dixemos noutras ocasións: a ousadía ten recompensa (ainda que somentes cando se acerta). Este home vai collendo fama de destemido. Atopándose entre os dous deuses históricos da competición, atrévese a desafialos e vai camiño de facer historia na meteoroloxía amateur. Pero antes de lamberlle a pirola…

A temperatura mínima non se fixo agardar. Nas primeiras horas da xornada acadáronse os 12º C. que xa serían definitivos. Tivemos que esperar ata a hora do vermú para rexistrar a que sería a máxima do día, 14º C. O refacho máximo chegou na tardiña, con 31 km/h. Pouco despois chegou a chuvia, cara as 19 horas, con aleivosía, dado que poucos esperaban esa treboada tan cedo, cando as prediccións a auguraban no final do día. 3 litros nun marxe de tempo pequeno decantaban a balanza cara o novo líder.

Kaltxon sumou 19 de 20 puntos na temperatura, pleno na chuvia e 1 km/h. por riba do refacho perfeto. 58 puntazos, vitoria en soidade para empatar a vitorias con Botikas e o liderato da competición a falta de 4 xornadas. Para máis comentarios, ler o primeiro párrafo deste artigo. Simplemente impresionante. Parabéns!!

Tras del, con 57 puntos, Landrán, cunha traxectoria impecable a non ser polas penalizacións por tardoso. Cómo botará en falta eses 20 puntos perdidos… Volve arrimarse o Top-5 e semella perigoso canto máis se achega o final. Noraboa tamén para Rasdgar, novato do ano que volve superar a Modesto e chega á 13ª posición, con marxe para soñar. Impresionante tempada de debut. Futuro aspirante a fazañas maiores.

Grupo de 5 con 55 puntos con Botikas á fronte, que perde o liderato pero mantén unha distancia aceptable cara o final de Liga. De seguro ainda ten unha carta na manga. Beocha volve coller respiro ante Marius para manter a 4ª praza pero mira de reollo como se achega Landrán. Popolo e Balboa están na loita por un Top-10 que nesta edición págase carísima e que ten moit@s pretendentes dende o principio. 12º e 15º respectivamente, ainda non dixeron a derradeira palabra. Lume segue a buscar unha vitoria que se lle resiste unha semana máis e de seguro non quere rematar sen ela. Lonxe do Top-20 ha de ser máis que unha esixencia para ela.

Estes son os 8 mellores resultados na xornada de Punta Candieira, 22ª da X Liga da Inverneira. Na Xeral, Kaltxon colle o liderato, con 2 puntos de marxe sobre Botikas. Verducido semella descartado a 9 puntos do líder, con Beocha 4ª en terra de ninguén, pero con Marius e Landrán ó acecho. Xornada decepcionante para Xowi e Mina que ven como Breogán77 se lles bota enriba e maldita para Compoñente Sur cun resultado que fai que xa note o alento dos lobos Víbora e Balboa, ainda que mantén a 10ª praza da xeral.

Pero semella que ninguén dixo ainda a derradeira palabra, polo que a loita continúa e xa vemos preto de nós o monte Fontecada, unha das etapas con máis fama desta, nosa e vosa, competición única no mundo.

Para acadar tódolos datos recollidos en Punta Candieira,pica no enlace que ofertamos baixo estas verbas.

Sorte e clima!!

A X Liga da Inverneira de eltiempoentuojete chega ó seu derradeiro tramo co desenvolvemento das 5 etapas finais na busca dun gañador final. Esta parte comeza coa etapa no concello de Cedeira e a súa estación mítica de Punta Candieira. Non semella que vaian mudar moito as cousas a partir do que nos din as prediccións, que auguran temperaturas mornas, vento frouxo e pouca precipitación, pero o certo é que nestas alturas cada punto conta moito e o resultado final pode amosar un pouco de luz cara vindeiras etapas.

As apostas para as temperaturas máximas van dende os 14 ata os 17º C. Pola parte das mínimas atopamos valores entre os 9 e os 13º C., cunha aposta refrixerada de 5º C. As cantidades de chuvia a recoller están entre os 0 e os 4 litros, cunha aposta enchoupada nos 12 litros. Os refachos de vento apostados oscilan entre os 13 e os 69 km/h., sendo o máis aberto dos parámetros xogados.

Tendo en conta estas apostas estamos ante unha etapa moi interesante e que non deberías deixar de seguir ao vivo dende este enlace, esta mesma madrugada dende as 01:40 horas e dende a mañanciña do domingo ata o final da xornada. A Liga en xogo dende eltiempoentuojete.

As apostas:

Saúde e sorte!!