O acontecido esta fin de semana no concello de A Fonsagrada está dentro ou é propio da inverneira galega, sobre todo da provincia de Lugo. Temperaturas baixas, chuvia e auganeve e un vento que sen ser furacanado deixou unha sensación térmica moi por baixo do que o termómetro reflictía.

A temperatura mínima déuse cara o final do día acadando os 2º C. A máxima chegou ata os 6º C. despois do almorzo. A chuvia, incansable durante todo o día acabou sumando 12 litros, mentras o vento tivo o seu refacho máximo en 57 km/h.

Como non podía ser doutra forma con esta inverniza atopamos un vencedor en soidade en Kaltxon, que despois dun comezo de Liga titubeante semella coller calor nas derradeiras datas. 59 puntazos, a piques do pleno, mallando temperaturas e chuvia e deixando atrás un punto no refacho. Con esta vitoria achégase ó Top-10 con gañas de superación e volver á senda do pasado curso. Gran exhibición no cumio lucense!!

Dous puntos por tras, con 57 sumados, Botikas e Julio, rematando no Top-5 Julio e recuperando a segunda praza Botikas, restando 4 puntos a diferenza coa lideresa. Apostas moi similares con idéntico e fantástico resultado. Fixeron cocido en O Xipro.

55 puntos para Rasta que volve o Top-20 agardando que sexa definitivo. Mallou o refacho e estivo atinado no resto de parñametros para voltar ás boas costumes. A seguir nelas!!

Sumou 54 puntos Popolo para manter o podio e coller folgos cos persecutores. Semella que pode tocar a campá nesta edicióne mantén a candidatura ó título. Recuperando a honra!!

A lideresa Magor e Beocha son dúas das donas que se estableceron no Top-10 e desafiuzalas non vai ser sinxelo. Con 53 puntos, Magor mantén 12 puntos co segundo clasificado e Beocha volta á 7ª praza nunha xornada na que aguantaron o tipo entre @s mellores. A busca da gloria!!

E con 52 puntos outra dona que non se rende nunca. Sarabia tenta voltar ó Top-10 que nunca debeu abandonar. A só dous puntos e ás mesmas posicións de acadalo. O inverno é o dela!!

Estes son as 8 mellores puntuacvións da 11ª etapa da Liga da Inverneira ó seu paso por O Xipro. Para acadar toda a información recollida no concello de A Fonsagrada, pica no enlace que ofertamos por baixo destas letras.

Saúde e clima!!

Damos inicio ó inverno meteorolóxico en eltiempoentuojete coa entrada das etapas no interior do país, en Ourense e Lugo. É nesta última, no concello de A Fonsagrada, na estación de O Xipro, onde arrinca esta andaina. E a priori fáino como ten que ser, con temperaturas baixas pero con ameaza de chuvia durante todo o día. O vento semella ser o propio das zonas montañosas, sen chegar a compararse cunha borrasca forte atlántica. O nordés xa será dominante na semana entrante…

As apostas en temperatura máxima están entre os 2 e os 10º C. cunha aposta alonxada de ata 14º C. Polo que respecta ás mínimas, oscilan entre os 7 e os -3º C. Moita variedade tamén na chuvia, con prediccións que van dende 0 ata 20 litros. Polo que atinxe ós refachos de vento, atopamos valores dende os 20 ata os 65 km/h.

Con esta disparidade de opinións semella que imos ter unha xornada cambiante e con emoción ata o derradeiro minuto de xogo. Convidámoste a seguila ao vivo dende este enlace a partires das 01:40 horas desta mesma madrugada e durante o domingo ata o final do día. Súbete ó noso carro cargado de inquietude e excitación!!

As apostas:

Saúde e sorte!!

A etapa de A Gándara, en Vimianzo, volveu ser case unha repetición do acontecido en Lira. Pero desta vez, a maioría de meteoludópatas pecou por de máis, no canto de quedarse curtos coma no concello de Carnota. A borrasca pasou a zoar por Vimianzo, concentrándose no centro e sur do país e deixando A Gándara coma zona seca no domingo. Volvemos atopar o gañador na zona baixa e de novo os artistas consagrados quedan en ridículo cos seus resultados.

A temperatura máxima acadou os 14º C., baixa para a zona e o contexto. A mínima chegou ata os 11º C. no final do día. A cantidade de chuvia foi de uns miserentos (para a maioría) 4 litros, mentras o refacho mñaximo fixóuse en 57 km/h.

Con estes valores e facendo contas atopamos a Bar Pequeno como gañador único da xornada. Perdeu 2 puntos na máxima, somentes 1 nas precipitacións e ata 5 no refacho para un total de 52 puntos. Gran triunfo dun xogador que nos ten acostunados ó millor e o pior indistintamente. Váise achegando lento pero seguro cara o Top-10 de vitorias históricas. Na xeral, pouco que destacar, pois as 3 incomparecencias son un lastre moi custoso. Pero en Vimianzo non tivo rival!!

51 puntos anotou un vello gañador desta nosa competición senlleira. Víbora deixou 5 puntos en chuvia e mantívose regular no resto dos parámetros, acadando unha gran subida na xeral ata o posto 9. Top-10 para el, que fai unha etapa moi destacable. Noraboa meu!!

E de novo M. B. Joaquín entre os destacados, con 47 puntos despois de gañar en soidade en Lira. Chega ata o posto 22 despois de 2 xornadas épicas para el. De ter continuidade neste ritmo, pronto o veremos ameazando o Top-10. Andas na llama!!

E con 45 puntos dous ocupantes da zona baixa que asoman a cachola neste día. Kalandrakas está no posto 27 buscando darse unha homenaxe entre resultados mediocres e semella que pronto dará unha puñada na mesa. Denodeno xa deu esa puñada no vran pero no inverno colle frío e queda xeado. Pero semella se duchou en caldo nesta ocasión. Maravilla leervos no resumo dos mellores!!

44 puntazos, que son moitos en Vimianzo para Compoñente Sur e Popolo. O primeiro recupera sensacións entrando no Top-20, sempre agardamos máis deste gran competidor. Popolo, uns dos decanos da competición asoma por onde fai anos que non estaba, na 2ª posición compartida. Pódese sentir fachendoso despois de tanta vergoña acumulada por anos. Desta vez, o saber ocupa un bó lugar!!

Con 42 puntos, un cuarteto con aspiracións. Julio repite puntuación para colocarse no 12º posto, con Sarabia xusto detrás. Marius xa está 6ºno grupo dos persecutores do liderato. E gran mención especial para Magor, superlideresa nesta 10ª xornada, a gran sorpresa nesta edición, que xa conta con… 16 puntos de vantaxe!! sobre os persecutores.Poderíamos dicir que somentes ela pode perder esta liga, pero mirando atrás non sería a primeira vez que ocorre (mención a Kaltxon, acórdaste?). Pero hoxe ninguén lle pode quitar esa supremacía asoballante. Moit@s están e estiveron ás portas do Olimpo meteorolóxico amateur pero Magor ven coa pata de cabra!! Moito imos ter que remar tod@s para recortar distancias…

Estes son os 10 mellores na estación de A Gándara durante a 10ª etapa da Liga da Inverneira. Para coñecer todo o derenrolo desta escabechina,picano enlace que ofertamos baixo este texto.

Saúde e sorte!!

Nova xornada, a 10ª, con epicentro na Costa da Morte onde se busca a confirmación d@s nov@s aspirantes ou a rehabilitación das vacas sagradas da competición. Semella que imos ter unha nova etapa de borrasca atlántica durante o domingo. Vento e chuvia media-alta é a predicción das axencias profesionais do ramo, pero iso non significa nada para os participantes de eltiempoentuojete, que son quen de poñerse en tela de xuizo cada semana. Estas son as prediccións para A Gándara, a estación meteorolóxica do concello de Vimianzo.

As apostas recibidas para temperatura máxima oscilan entre os 14 e os 17ºC. Polo que respecta ás mínimas, obtivemos valores que van dende os 10 a os 14º C. Na távoa de precipitacións, as cifras están entre os 0 e os 25 litros acumulados. Polo que atinxe ós refachos de vento estes van dende os 15 ata os 89 km/h.

Con tan dispares opinións o que nos depara en A Gándara é unha suma de emoción e incertidume polo resultado final. Esta etapa obligatoriamente deberías seguila ao vivo dende este enlace a partires das 01:40 horas desta mesma madrugada e dende a mañanciña do domingo en horario continuado ata o remate da mesma. E recorda: vento a primeira hora, chuvia dende a noite ata a tardiña e baixada de temperaura no final do día. Non o perdas!!

As apostas:

Sorte e clima!!